Clarins Huile Lotus Face Treatment Oil – Oily or Combination Skin زيت اللوتس لعلاج الوجه من كلارنس – للبشرة العاديه أو المختلطه

 

مراحب  ~ مراحب

اليوم عندي ريفيو عن شي خرافي .. عجيب ، كلمة روعه قليله في حقه

والغريب في الموضوع ، إني كنت متخوفه من تجربته ، ومن أكثر المعارضين لاستعماله

شنو هو ؟؟ 

 

زيت معالج للوجه .. بخلاصة اللوتس ، من شركة كلارنس .. خاص للبشرة العاديه إلى المختلطه

وهو نوع بشرتي في الفتره الحاليه ، لأنها قاعده تتصرف بطريقه غريبه من بداية الصيف ..
مرات تدهن وتطلع لي حبوب ، ومرات اشوفها جافه

قريت كذا مقال طبي تجميلي عن علاج عدم توازن البشره بالزيت ،
لكن مو اي زيت عادي نستعمله ، لأن معظم الزيوت المتوفره اللي نشتريها سواء من السوبر ماركت أو الحواج
تكون : قديمه ، او مغشوشه (يعني مخلوطه مع اشياء ثانيه ما تكون خالصه Pure )
او انها تكون بصيغه دهنيه مزعجه ورائحتها كريهه تسد المسامات وصعب الاستمرار عليها

قلت ما بخسر شي Let's give it a try ! ورحت اشتريته

هو يتوفر بكذا صيغه ، اعتقد في نوعين اثنين غير اللي شريتهم واحد للبشرة الجافه وواحد للبشرة الدهنيه

انا خذيت للبشرة العاديه إلى المختلطه

 




 

تركيبة الزيت :

عباره عن مجموعة متجانسة من الزيوت الأساسيه ، مستخلصه من حصا البان ، اللوتس ، الجيرانيوم ،
زيت البندق والكاموميل (أو البابونج)

خالي من المواد الحافظه "Preservative Free"

معبأ في قاروره زجاجيه شفافه ، والتطبيق عن طريق قطاره صغيره

حجم العلبه : 30 مل

السعر : 22 دينار (220 درهم / ريــال)

 

طريقة استعماله :

  احط 4 الى 5 قطرات على اطراف اصابعي ، وافركه فرك خفيف
ثم اضغط على جميع مناطق الوجه والرقبه قبل النوم ممكن وضع كريم الليل المعتاد بعده ،
او ممكن خلط قطرات منه مع كريم الليل

ويصير نحطه بروحه بدون اي شي .. انا استعمله بروحه يكفيني

ساعات اتهور واحط عشر قطرات من كثر ما حبيته وريحته تهديني

تجرتي : 

 اول شي اختلف علي الموضوع لأني ما احب احط دهون على ويهي ، لكن خلال عشر دقايق تقريباً ما كان في اثر له ..
بس بقت لمعه بسيطه في الوجه يعني ما يكون مطفي مثل لما نحط كريم الليل العادي

ريحته جميله جداً ومهدئه للأعصاب ، اعترف إني غطيت في سبات عميق أول ليله استعملته

ثاني يوم الصبح ، قعدت ويهي للحين رطب ، حتى ما حطيت كريم مرطب تركته يتنفس شويه

استعملته ثاني ليله ، والصبح لقيت ويهي فيه لمعه جميله ، ارتياح في القسمات

بعد تقريباً اسبوعين من الاستعمال المتواصل يومياً ، فر ق شاسع في نضاره ويهي

صارت البشره متوازنه أكثر ، واقصد بكلمة "متوازنه" يعني مافيها دهون زياده ولا حبوب ، وفي نفس الوقت مافيها جفاف

يعني شدت حيلها البشره  وصارت نقيه ومرنه أكثر من قبل
مو عارفة شلون اوصف لكم قصدي ، يعني صارت معالجه نفسها بنفسها ، ما تحتاج كريمات وايد وترطيب خارجي

انا ما عندي اثر مسامات كبار ، لكن هم ذاكرين انه يحسن من شكل وبروز المسامات ، و يزيد من تماسك الخلايا

صرت ما استغنى عنه ، وشريت منه علبه ثانية

وهو أصلا يظل فتره طويله ، لأن الاستعمال مقتصر على قطرات معدوده

رغم إني أزيد الكميه شويه  !! ما أمشي على كلامهم ، احس اربع قطرات ما تكفي ويهي كله

صحيح انه مجرد مجموعه من الزيوت ، لكن الدور اللي لعبه "حسب تجربتي الشخصية" اكثر من مجرد زيت

معالج للوجه + مريح للأعصاب + منوم بسبب ريحته العطريه الهادئه

ومعروفه طبعاً الزيوت العطريه في تهدئة الأعصاب وعلاج اضطرابات النوم

 

 



حاولت قد ما اقدر ابين لكم الأسم في الصوره ، لكن بسبب ان العبوه شفافه الكتابه مو مبينه عدل

بعد ما كنت ضد استعمال الزيوت على الوجه ، عجبتني التجربه لأقصى حد

كنت متوقعه شي وطلع شي ثاني

عيبه الوحيد ، بما انه زيت ممكن تتسرب بعض القطرات من القطاره أول ما تفتحينها

يعني قوامه مب متماسك ، فالأفضل وضع فوطه تحته علشان ما تتوصخ التسريحه

أو احطه بسرعه على اصابعي قبل لا تنزل القطرات على تسريحتي

أما الإغلاق فهو محكم ، والغطاء عالي الجوده يعني ما يتسرب أي شي من الزيت خارج العلبه

   

 

 

اتمنى يكون ريفيو اليوم عجبكم

ومع تدوينه جمالية أخرى لنا لقاء بإذن الله