مجموعة لاش للفالنتاين Lush Valentine's Collection

حصرياً وقبل الكل ..

 

بدون أي مقدمات ، عندي لكم سبق صحفي خطير  LoooL
كولكشن لاش (Lush) بمناسبة الفالنتاين/عيد الحب عندهم (14 فبراير) نزل السوق
السوق في الدول الغربيه يكون على أشده في هالوقت ، هذه المناسبات بالنسبه لهم موسم كبير للتسوق
وكل كل كل الماركات والمحلات تنزل بضاعه يديده ، أو ليميتد إديشن (Limited Edition)
لأنهم بالفعل يصيبهم جنون بالشراء ، خصوصاً الهدايا
عادي طول السنه ما يشترون شي ، بس في مناسباتهم الكل يشتري



رغم اني ما احتفل بالفالنتاين واصلا ماني متزوجه ولا مخطوبه
احاول قد ما اقدر اشوف السوق شنو منزلين في هالوقت ، لأن البضاعه تكون حلوه
وبما أني أحب لاش ، كنت أنتظر منتجاتهم نتزل
الحمد لله ، حظي حلو أن اختي مسافره دبي ووصيتها عليهم، ولا كنت بتوهق لأن المحل غير موجود عندنا

طبعاً وصيتها على أغراض ثانيه مع مجموعة الفالنتاين ، والحمد لله وصلتني المؤونه
لحد ما نروح المره اليايه الامارات أو الكويت ان شاء الله






مجموعة الفالنتاين فيها 6 منتجات ، كالآتي :


Tender is the night : زبدة للجسم بزيوت الورد العطريه
مثل الياسمين واليلانغ يلانغ ، خلاصة الفانيليا وزبدة الشيا ،
خذت لي 2 منها
لأنها ما تنزل إلا مره واحده في السنه







Close to you : قرص للمساج بالفانيليا والياسمين وزبدة الشيا
وصيت أختي تييبها بس ما حصلتها
هذي لها نفس ريحة فقاعات الحمام من عندهم اللي أسمها Creamy Candy



Love Locket: أملاح للبانيو ..عجبني أسمها وايد ، يعني "قفل الحب"

وهي شكلها قلب في وسطه قفل المفتاح 

 داخلها قلب ثاني صغير ، تقدرين تكسرينها وتطلعينه علشان تستخدمينه مره ثانيه
واذا تحبين الكميه تكون كبيره ماله داعي تكسرينها.
مكوناتها زيوت طبيعية مثل الياسمين والنيرولي ، وخلاصة الفانيليا.
تفاجأت بحجمها على الحقيقة !! كبير ، خلتني أفرح






الباقي من المجموعه 3 شغلات :
صابونه (Neon Love)
شاور جل (Prince Charming)
مرطب للشفايف (The Kiss)
لكن "ما عندي هُما"
تحيه خاصه لأهل جدّه
ترى تعلمت لهجتكم من طاش ما طاش ، خصوصاً من الشيخ عدنان ، والشيخ فؤاد ، وأسعد عمر قللي ..
شقاعده اقول انا ، طلعت عن الموضوع



السبب اني ما طلبت من اختي تجيبهم ، لأني ما استخدم الصابون ذاك الزود...
والشاور جلز في عندي منهم مخزون فائض حرام يعني ،
أما مرطب الشفايف رغم أن يقولون ريحته حلوه وينعم ،
لكن أنا استعمل مرطب ديور Creme de rose ومرتاحه عليه فما أحتاجه ،
مو بس زيادة مشترى على الفاضي ..


بشكل عام ، الكولكشن يطغى عليها الروائح الرومانسيه والهادئه ، فانيليا خفيفه وورود
واللون البمبي بمبي بمبي


مو قادره اتخلص من حبي لأغراضهم ، أحسهم ألعابي واحبابي ولما استخدم شي منهم اتضايق لأنه خلص
في وايد شغلات وصلتني ، لكن المجال ما يسع أحطهم كلهم
بس على السريع ، من بعض الأشياء الحلوه :

مقشر الرجل اللي لونه أزرق على شكل رجل"Stepping Stone"
هذي تكسرين نتفه منه وتضيفين عليه بس شوووية ماي دافي لي ما يصير نفس العجين
بعدين تدهنينه على القدم والأماكن اللي فيها جفاف ، وتغسلينه بعد خمس دقايق
ينعنع الرجل ويخفف الجفاف ، يستحق إني أذكره






رغوة البانيو أماندوبوندو "Amandopondo" في وردة في وسطها






Rose Queen: أملاح البانيو بخلاصة الورد الدمشقي 

 في أحلى من جذي  لا وبعد فيها بتلات زهر الليلك المجففه
لكن ترى مو كثير بس كم من قطعه ، شوفو الصوره
قلبي .. ريحتها لا تقاوم





إن شاء الله تنفرج ويفتحون في الدمام مثل ما سمعت ، على الأقل راح يكون أقرب مكان للبحرين




مع تدوينه جماليه أخرى ، لنا لقاء