Current favorite hair products روتين غسل وترطيب الشعر

مرحبا

 

اليوم راح تكون التدوينة عن روتيني الحالي اللي اتبعه في غسل شعري وترطيبه
 ومجموعة من الأشياء اللي استعملها وارتحت لها

صار لي تقريبا شهرين اتبع نفس الخطوات والمستحضرات (ما عدا ماسك الشعر صار له فترة طويلة)
راضية تماما عن النتيجة ..

 

 

 

 

 

الشغلات اللي راح أتكلم عنها بعد شوي ، هي اللي خلت شعري يصير طري أكثر وفيه لمعه حلوه ، وخف التقصف بنسبة كبيرة

و الشعر اللي يطيح في الفرشاة مع التمشيط صار أقل بواايد ، نسبة لا تكاد تذكر

 

أول شي ، طبيعة شعري والمشكلة اللي دايما أدور لها على حل هي جفاف الشعر ..
لكن في نفس الوقت أحمد الله أن شعري مب دهني

بالنسبة لي أشوف ان الشعر الدهني مشكلته حلها أصعب ، يعني ما اتصور إني أغسل شعري وفي نفس اليوم تمتلي الفروه دهن !!

وبعد أحس ان الشعر الدهني يصير خفيف وضعيف وايد ..
 

لكن مع شعري الجاف ، صحيح انه يتقصف بسرعة بس حلوله بسيطه ... يبي له أكبر جرعة من الترطيب والأمور تمشي تمام 

راح تنصدمون من منتجين غير متوقعين ، مثل ما أنه انصدمت منهم ... نتيجتهم خياليه رغم ان سعرهم رخيص

 

يالله نبدأ :

 

+ أول شي استعمل شامبو من ايف روشيه بزيت الهوهوبا للشعر شديد الجفاف 

Nutri-Repair Treatment Shampoo - Jojoba

 

 

 

عندي قناعة إني كلما اخذت شي مكثف للشعر شديد الجفاف شعري بيستفيد أكثر

وفعلا هالشامبو فادني ، وخلى شعري يصير طري ولين بصورة خيالية

 خالي من السيليكون والألوان والبرابين وقوامه كريمي مثل الحليب ، وبعد ريحته حلوة

السعر : 39 ريــال من ايف روشيه - الظهران مول
 

 

 

 

خلو منتجات الشعر من السيليكون لها أولوية كبيرة عندي ، رغم ان في ناس يدورون على منتجات شعر بالسيليكون !!

لأنه يغطي الخصلات بطبقة سيليكونية و يحافظ على الشعره من التقصف

لكن على المدى البعيد يسوي تراكمات أو Build Up على الشعر وعلى فروة الراس

ويسبب تساقط وضعف في البصيلات ، أو على الأقل يعطي شكل كأنه شعر اصطناعي مثل شعر الباربي

 

 

 

+ هالمنتج أول واحد من المنتجين الصادمين !!

 كنت محتاجه بلسم ضروري ورحت السوبر ماركت اللي يم بيتنا بسرررعة علشان اغسل شعري وشريتهم عشوائيا

أولا : بلسم للشعر اسمه كريم سيلك ريكونستراكت  ،  والترجمة تعني إعادة بناء حريرية , مادري شفيني اتفسف في الترجمات :)

Cream Silk Reconstruct - Damage control conditioner

 

 

 

 

عبارة عن بلسم يتوزع على الشعر (الجذور لا) بعد غسل الشعر

 يعيد بناء الشعر المتضرر ويحد من أي ضرر أو تلف إضافي

الغريب في الموضوع انه مصنوع في الفلبين !! وسعره دينار وشي (يعني حول 13 ريــال) !

واااايد وااايد رطب لي شعري مع إني كنت أول مره أشوفه وكنت بس أبي اغسل شعري وخلاص كان البلسم مخلص من عندي

اعتقد ان مو شرط كل شي رخيص سيء الجودة ، ومو شرط كل شي غالي زين

حظك نصيبك :)

 

بعد ما اغسله مباشرة شعري يصير انسيابي وطايح

اعتقد إني راح ارجع اشتريه مرة ثانية ، لكن مو لدرجة إني اخلي شعري يتعود عليه  

 

 

+ المنتج الثاني الصادم ...

حمام زيت فاتيكا للشعر المتضرر والمتقصف

Vatika Intensive Nourishment - Hot oil treatment

 

 

 

 

 

بعد شريته في نفس اليوم اللي شريت فيه البلسم ، شفته يمه وطخيته

من مكوناته حسب ما مكتوب على العلبة : بيض - عسل - خروع - نخاع

 

طريقة استعماله : بعد الشامبو يتوزع على الشعر وفروة الرأس

وأحب آخذ فوطه واحطها في ماي ساخن بعدين اعصرها واغطي فيها شعري (اقتراح مذكور على العلبة)
وبالفعل لقيت فرق من أول استعمال ...  وأنه قاعده اغسل شعري صار طايح مع الماي وطري وايد
وامرر يدي عليه مافيه اي تشابك .. والأجلى بعد ما ينشف الشعر يصير لين وفيه لمعة واضحة

 

السعر : دينار ونص (15 ريــال / درهم)

 

 

+ الخطوة التالية اختيارية ومره في الاسبوع اسويها ... حبيب قلبي من زمان

ماسك الماكديميا للشعر

Macadamia Deep Repair Masque

 

 

 

اتوقع ان وايد ناس يعرفونه ويستخدمونه ,, واختلفت حوله الآراء بين منتقد ومحب

انا من الناس اللي استفدت بصورة كبيرة من ماسك الماكاديميا ومب قادرة أتوقف عن استخدامه من سنة وأكثر

طبيعة شعري تغيرت عليه .. التقصف قل ، الخصلات صارت أطرى والشعر يلمع

وريحته جميلة جدا جدا

 

السعر : حجم 250 ml  -   تسعة دينار ونص (95 ريــال/درهم)
 الحجم الأكبر يمكن 500 ml حول 16 دينار (160 درهم/ريـال)
 

روتيني في غسل الشعر ، بعد شامبو ايف روشيه استخدم أو بلسم كريم سيلك أو حمام الزيت

ومره واحده في الاسبوع استعمل ماسك الماكديميا ، لما ابي ابالغ استعمل الماسك بعد البلسم :)

 

+ آخر خطوة وهي السهل الممتنع

اختراع ذكي في وجهة نظري من محلات ايف روشيه

معروف ان الخل يعطي لمعة للشعر ، وعلى أيام المراهقة المبكرة في المنتديات كانت وصفة رهيبة

كانت كل مشاركاتي على شاكلة : استعملي خل الشعر - حطي قدر فيه ماي مغلي وغطي ويهج بفوطه ! ههههه

بس هذي الأيام والتجارب هي اللي خلتني أحب العناية والاهتمام

 

المنتج هو : خل للشطف من ايف روشيه - بخلاصة التوت البري

Rinsing Vinegar

 

 

 

آخر خطوة أسويها قبل لا اطلع وبعد ما اخلص كل شي

أحط شوي منه على الشعر واتركه لدقيقة وبعدها اشطف الشعر عدل عدل واتأكد ان مافي اي اثر

التركيبه خاليه من السيليكون والبرابين
 

الهدف من استعماله هو اضافة لمعة للشعر وبث التوازن سواء في الشعر الجاف ، الدهني أو العادي

ريحته مثل ريحة التوت منعشة ، كأنه عصير توت بالضبط

وأهم شي ابي اقوله ، ما يحتاج تستخدمين كمية كبيرة منه شوي بس تكفي

يعني أول علبة خلصت مني يمكن في خمس أو ست غسلات !!

هو يبي له بس نقطه وتوزعينها شوي شوي لا تقعدين تسحبين في شعرج وتنتفينه
ما اقول ان ماعندي إمكانية إني استغنى عنه ، لكن ما احس ان روتيني اكتمل من غيره

 

السعر : يمكن 48 أو 55 ريــال - ايف روشيه الظهران مول

سعره مبالغ فيه شويه ، طبعا مافي أمل ينزلونه ... إلا بيستمر في الزيادة الغير مبررة كالعادة

 

 

اتمنى انكم استفدتو ولو بشي بسيط وخذتو افكار عن أشياء تحسونها مناسبة لكم