~ أهمية تنظيف البشرة ~

الخطوة الأساسية في العناية بالبشره هي {التنظيف} ،،
يعني لو تستخدمين كريمات وماسكات و سيروم ، على بشرة مو نظيفة
راح تظل في حلقة ناقصة .... 

 يعني لازم تتهيأ البشره لامتصاص الكريمات بإزالة الأوساخ والخلايا الميته والدهون الزائدة (إن وجدت)
اختاري غسول يناسب طبيعة بشرتج ، و مو ضروري يكون غالي
أهم شي انج كل يوم تغسلين ويهج ، وفي هذه النقطة .. في اختلاف
ساعات يطلعون لنا ، لازم تغسلين (يعني بالغسول طبعاً) مرتين في اليوم الصبح وبالليل
وفي دكاترة جلد يقولون ، بس في الليل يكفي علشان ما يصير في اختلال بتوازن البشره
وما ننزع منها كل الدهون الأساسية
ولك حرية الأختيار .. وماحد أدرى باللي يناسب بشرتك أحسن منك انتي
لأنك انتي اللي تحسين لو صارت جافه ، أو لو الدهون مضايقتج
يعني اللي بشرتها جافه وتلاحظ انها تصير مشدودة لما تغسلها مرتين ، مره واحده كافيه
والعكس صحيح ، اللي بشرتها دهنيه ، تغسلها مرتين ويمكن خلال النهار تحتاج تمسحها بتونر أو ميلك ،،،


Clarins Gentle Foaming Cleanser with Tamarind
غسول البشرة من كلارنس بتمر الهند ، للبشرة المختلطة والدهنية


حالياً ، استخدم هالغسول الكريمي من كلارنس ، ومثبته عليه من فتره .
اللي عجبني انه كريمي وما ينشف البشرة أبدا مثل معظم غسولات البشرة الدهنية
وأحس أن ويهي يصير نظيف عدل ومنتعش لما استخدمه
وكأن في طبقة مزعجه وانشالت ، شعور نعناعي بالدرجة الأولى
وريحته حلوه وايد .. ريحة نظافه






ملمسه يعجبني ، فيه حبيبات زرقاء صغيره تسوي تقشير خفيف ،،
ودايما ينصح للبشره الدهنيه (او اللي تعاني من الحبوب) ان الغسول المستخدم يكون فيه هالحبيبات ...
وبحركة دائرية خفيفه لمدة على الأقل دقيقة تدلكين فيه ، بس ما يستدعي الفرك بقوة علشان ما تتهيج البشره وتنجرح ...
وكثرة الضغط ترى ما راح يسوي أي فرق ، بالعكس ممكن يعطي نتيجة عكسية.
وأحسن شي لشطف البشره من الغسول استخدام ماء دافي ، لا حار مغلي ولا بارد.






السعر : 12 دينار (120 ريـــــال /درهم) يخلص خلال شهرين إلى شهرين ونص
و الحلو أن بس تحتاجين كمية صغيره لكامل الوجه ، ومافيه صابون وايد .


برجع اشتريه ؟ يمكن بعدين ، لأني حالياً أبي أجرب اشياء يديدة حاطتهم في بالي.
ممكن أرجع اشتريه اذا ما ناسبوني
وعلى العموم Clarins حلوه شغلاتهم ... كذا مرة استعمل شي من عندهم وما تخيّب ظني
والوالدة بعد ما تترك السيروم مالهم Double Serum .

الخلاصة ، ان تنظيف البشرة شي رئيسي في روتين العناية ، وانتي حسي بشرتج شنو تحتاج وشنو اللي يريحها ....