مساء الخير والجو الربيعي الجميل والأجواء الحلوة ...
لاشك بأن العين تعتبر من أهم معالم الوجه الجمالية ، وجمال العين ينعكس على الشكل بأكمله
وما أقصد بجمال العين بأنها لازم تتصف بصفات معين بالتحديد ، مثلاً ان تكون كبيرة وواسعة
أو رموشها طويلة جداً جداً ، أو انها تكون بلون معين علشان نقول ان هذي عينها جميلة
صدقوني ، انا ياما شفت عيون كبيرة وواسعة ومسحوبة على قولتهم ، بس ما قدرت اشوف فيها أي جمال
بل انعكست شخصية صاحبتها المتسلطة والأنانية منها ، وظهر الشر فيها بكل وضوح
وساعات ناس عيونها بعد كبيرة وحلوة ، لكنها مشوهة بهالات التعب والسهر اللي حوالينها
ما فيها أي نضارة ، هذي تصير العيون النضره المرتاحة أجمل منها بمراحل
في نفس الوقت ، شفت ناس عيونها صغيرة يادوب والله ، بس فيها سحر وجاذبية ورقة وطيبة ، تخلي الكل يحبها ويقع اسيرها
أكثر انسانة تخطر على بالي بهذي المواصفات واقدر اعطي مثال عليها هي : لارا اسكندر
من فيكم ما ادمنت ستار اكاديمي (طلعت فضايحي :)
لا تضحكون علي ، كلنا عندنا ماضي سخيف مضحك ههههه
كنت ما اقوت شي ما اطالعه في ستار اكاديمي ، ساعات كنت اغيب علشان ابي اتابعهم
ويوم الإيفال (اختبارهم الاسبوعي) مستحيل اطلع ولا اتحرك من البيت .. ويوم الجمعة في الليل كذلك
المهم ، لارا اسكندر كانت احدى المشتركات ، اعتقد في الموسم السادس ان ما خاب ظني
شوفو عيونها بتعرفون شنو قصدي
هني تحاول تكون الصورة غامضة وشريرة ، بس طيبتها فاضحتها :)
لذلك الأوائل من الناس كان عندهم علم الفراسة مهم جداً
يقدرون يعرفون نفسية الإنسان من شكله .. وانا مقتنعة تاماً بمصداقية هذا المبدأ والعلم
أما الحين ، ندخل لموضوع الريفيو لليوم
سيروم ديور للعين ، واسمه "آيز إيسينشال" من مجموعة كابتور توتال
Dior Eyes Essential serum - Capture Totale
السيروم عادة صيغته وقوامه اخف من الكريم ، لكن المفترض ان مفعوله يكون عميق وعلاجي أكثر من الكريمات
طبعاً هالكلام ما ينطبق على جميع السيرومات ، الجيدة منها فقط ، وقد نجد كريم ممتاز لدرجة ان مفعوله احسن من ميلوين سيرم
قوام هالسيرم سائل متماسك ومتوسط الكثافة ، شبه خالي من اي رائحة مميزة يمكن شمها
الغرض منه : إعادة تجديد خلايا محيط العين ، مخفف لعلامات التعب ، وتعزيز الشكل والنضارة
يعمل بتقنية إزالة السموم او الملوثات المتراكمة بدائر العين ، ويعزز العملية الطبيعية لتجديد الخلايا
يقولون ان صار لهم 19 سنة يبحثون لحد ما وصلو للتركيبة هذه ، صدق جذب مثل ما يقولون العراقيين
الله اعلم صح أو لا
طريقة استخدامه : الضغط من البمب ، ضغطة واحدة إلى اثنتين مو أكثر على طرف اصبع البنصر اليسار ، بعدين احط عليه اصبع البنصر اليمين وافرك الكريم بين اطرفهم حتى يدفى شوي
بعدين اضعط على المنطقة تحت العين بأطراف البنصر ضغطات شبه قويه من الخارج باتجاه مدمع العين الى الداخل
ولو بقت كمية على اصابعي ، اوزعها على الحواجب
أحلى شي انه بمب يطلع الكريم من الضغاط ، يضمن اني ما احط يدي داخل الكريم ،
حتى السابتولا او قطعة البلاستيك هذه اللي تكون مدمجة مع الكريم ما تضمن ان ما تدخل ملوثات داخل العلبة
إلا لو كانت محكمة الغلق
في نقس الوقت ، هالطريقة بتحافظ لي على الكريم من اني احط كمية اكبر من اللازم واهدره على الفاضي
النتيجة : ايجابية جداً ومرضية
لاحظت راحة في شكل العين منورة اكثر صارت كأني نايمه وقت طويل
خفت الهالات والانتفاخ ، لان مشكلة عيني دايم تنتفخ من لبس العدسات الطبية ، ما احب البس النظارة ابد
فدايم تكون عندي مشكلة الانتفاخ ..
السعر : 31 دينار يعني 31 ريــال / درهم
حبيت اقول ملاحظه مهمة جداُ
لا تعتبروها إسقاط بحق جميع مستحضرات العناية بالبشرة
لكنها حقيقة لا يمكن إنكارها مهما حاولنا
الملاحظه هي : مهما استخدمنا من كريمات للوجه ما بنستفيد منها استفادة كاملة لو ماكنا ناخذ قسط كافي من الراحة
ولو ما كنا نشرب ماي يكفي احتياجنا اليومي
بالنسبة للتغذية ما راح اعيد لأنه صار معروف للجميع تأثيرها الكبير على البشرة
بس حبيت اشدد على النوم ، ولا وحده بتقدر ترصد نتائج من كريم العين لو ماكانت تريح نفسها وتريح جسمها بعد التعب الجسدي والنفسي اللي يمر عليها على مدار اليوم بأكمله
تخيلو ماكينه أو جهاز طول اليوم يشتغل بدون توقف بعدين لما يسكر المصنع يخلونه شغال ما يطفونه
شنو بتكون حالته ثاني يوم الصبح لما يرجع المصنع يفتح ويبون الجهاز ينتج لهم ؟؟
أكيد كفائته راح تتدنى ، وترتفع حرارته ومع الوقت ممكن خلاص يطلع من الخدمة يخترب
ومن رحمة الله بنا ان احنا مو نفس الاجهزه هذه طبيعتنا مختلفة ، لكن لابد ان نراعي حق بدننا علينا
" إن لبدنك عليك حق "
عليكم بالنوم لساعات كافية بالأول ، وبعدين بتلاحظون تحسن ، يمكن ما تحتاجون لكريم عين من أصل
لان احتمال كبير تتفاجئون بان ما عندكم مشكلة الهالات السوداء من الأصل ..
أشوفكم على خير ...
