تقييم لبعض منتجات لاش Lush Haul & Review

هلا وغلا 

ما أجُوز أنــــا عنّه ... أغراض الدوش والكريمات
وخصوصاً لما تكوُن من عند لاش .. حبيب ألبي


طبعاً هل السعودية والإمارات والكويت ، عندهم كنز كبير .. ألا وهو وجود هالمحل عندهم
مادري متى بيفتح في البحرين
وصرت كل مره أسافر ، أول مكان أروح له هالمحل


وعندي القدره على رصد رائحته على بعد أميال .. يعني مره كنا في دبي مول ندوّر عليه
وأقول حق أختي : انا شامه الريحه ، وطلع فعلا بالضبط في الطابق اللي فوقنا مكان اللي كنا نمشي

شعوري أول ما أدخل المحل ، كأني طفل داخل دكان الألعاب ويبي ياخذ كل شي
أسوي روحي عادي وكأني مو مهتمه ....
وأنا من داخلي ودي أطير من الفرحه
وحشني

بلملم جروحي ، وادخل في صلب الموضوع



لاش {Lush} محل بريطاني ، كل منتجاته طبيعيه ،
بعضها فيها نسبه بسيطه من المواد الحافظه تخليها صالحة لفترة قصيرة فقط
لكن الأغلبية بدون أي مواد حافظه أو مركبات صناعيه ،،
علشان جذي تنتهي بسرعه ، والأفضل أن الواحد ما يشتري مخزون منها
حتى في عندهم ماسكات للوجه ، فريش {Fresh Face Masks}كل مكوناتها طازجة
فترة صلاحيتها شهر واحد بس ، و بعد لازم تحطينه في الثلاجه بعد كل استخدام ...
[ أترككم مع صور من داخل المحل من سفرتي السابقة للإمارات ... علشان تدخلون في الجو ]











# المشتريــــــــــــــــــــــــــــــات وتقييــــــــــمها #


1- قناع طازج للوجه : Cosmetic Warrior
للبشره الدهنية ، ينظم إفراز الدهون ويخفف من الأحمرار والتهيج وحب الشباب
ينحط بس عشر دقائق ، على وجع مغسول ونظيف
ريحته كلش ما عجبتني ، مستحيل أرجع اشتريه أبداً مع أنه نفعني وريّح بشرتي
بس كنت أشم ريحة البيض والثوم قويه ، أحلى ريحه تطلع منه لما أغسله ، تقلب على شاي أخضر
السعر : 55 درهم








2- زبدة الجسم : Aqua Mirablis Body Butter
رغم أنهم مصنفينها كــ زبدة الجسم ، إلا أنها عباره عن قالب يشبه الصابونه وظيفتها تقشير وترطيب الجسم
يمكن لأنها تعطي ترطيب فحطوها تحت هالتصنيف ~
بعد ما تخلصين الاستحمام ، ويكون الجسم مغسول خلاص ونظيف ، بس رطب ..
تمررينها على الجسم بحركة سريعه وبعدين تغسلين بالماء

كانت حلوه الصراحه نعمت جسمي لكن ريحتها للأسف مو ستايلي ، تشبه زبدة الفول السوداني أو المكسرات
مع أني بعد كذا استخدام ابتديت اتعود عليها وأحبها ، لكني أفضل الروائح الزهريه والفريش أكثر
عيبها أنها تخلص بسرعه ، يعني مجرد ما تلمس الماي تبتدي تذوب ...
حاولت أقصها لكن ما نفع تفتفتت كلها
السعر : 70 درهم ~ أحس وايد عليها ، في أنواع ثانيه عندهم أحسن منها (حسب رأيي)







3- فقاعات للبانيو : Creamy Candy Bubble Bar
يا الله يا الله يا الله .. شو هالحلاوه والجمال .. ريحتها حلوه وايد مع أن فايدتها قليله
ترمينها في البانيو والماي مفتوح وراح تطلع فقاعات ، لكن في هذي الفقاعات أملاح وزيوت 
تحتوي على زبدة الكاكاو وزيت اللوز ، وتساعد على إعطاء الرطوبة للجسم ، يعني 2 في 1
أحلى شي أن لونها [البمبي] وريحتها تحسن النفسيه ، يعني حتى لو كانت فوائدها محدوده تلعب على النفسية ،
ترى بعض الأحيان ، الشغلات اللي تعدَل المزاج وتفرّح تكون أهم ، مو كله فايده فايده
السعر : 30 درهم







4- كرة أملاح للبانيو : S-- Bomb Bath Ballistic
ترى حذفت الحرف الثاني والثالث من أسمها ، ما حبيت أكتبه ..
هي عباره عن كره ، ترمينها في بانيو مملوء بالماء (حلوه مملوء !! ) متروس يعني ، وراح تطلع اللي في قلبها ..
راح يصير شي خيالي ، تبتدي الكره تذوب وتطلع ريحه رآئــــــــــــــــــــــــــــــــــــــعه ، وفي ورده تطفو على السطح لما تخلص
بيصير لون الماي كله وردي ، لكنه ما يلصق ولا يترك أي أثر لا في الجسم ولا في البانيو
ترى أنا أخاف على سلامة البانيو وماراح أحط أي شي يخربه ،،، 

 كل شي في هالكره الصغيرونه يصرخ بالجمال ، لونها .. ريحتها .. شكلها .. حتى مكوناتها
زيوت اليلانغ يلانغ والياسمين ، اللي يزيدون من ليونة الجلد وفي نفس الوقت تخليج تهدئين وتسترخين
أحبها وايد وايد وايد ..
السعر : 34 درهم






5- قالب المساج : Hottie Massage Bar
عبارة عن قالب مكون من زبدة الكاكاو , زبدة الشيا , زبدة الجوجوبا و الفانيليا ، ومكونات أخرى ثانويه
هذي تستخدم بعد الاستحمام و تنشفين بالفوطه ، ثم تدلكينها على الجسم
هي زبدة أسم على مسمى .. تخلي الجسم زبدة
تعطي جرعه قوية من الترطيب وتساعد على إراحة العضلات المرهقة
أنا أحب امررها على كل المناطق ، لأن مافيها أي مواد ضاره ..
يعني تقدرون تحطونها على الصدر ، والأفخاذ وتحت الأبط ، علشان تزيد النظاره فيهم ، انتو فاهمين قصدي ..
بعدين اروح البس ملابس قطنيه بأكمام طويله علشان ما تنمسح وانا نايمه
أصحى ثاني يوم ألاقي جسمي صار كنه زبده .. وريحتها حلوه وناعمه
السعر : 65 درهم








خلصت جولتي .. بس باقي أقول لكم شغلات مهمه إذا حابين تشترون من عندهم أي شي :


+ طريقة الحفظ تلعب دور كبير في عدم تلف المنتجات ،،
هم عندهم علب معدنية علشان تحطون فيهم قوالب الزبده والمقشرات ،
لكن أنا اي شي يستخدم خلال الشاور ويكون عرضه للبلل
أحطه في حافظة الصابون اللي تكون فيها فتحه من تحت علشان ينزل الماي الزايد وتنشف بسرعه ..
بعدين أطلعهم كلهم وأحطهم في بوكسات بلاستيك
ولو في زبدة جسم أستخدمها كل يوم ، أحطها في العلبة المعدنيه اللي من عندهم (اعتقد سعرها 20 درهم)
طبعاً كل وحده والطريقة اللي تفضلها


+ لازم تعرفون مميزات وفوايد المنتجات من البائعين ، ولا تستحون تسألون ..
ترى أهم شي أنكم تعرفون طريقة الاستخدام الصحيحه !
علشان تستفيدون من اللي شريتوه وما تضيعون فلوسكم على الفاضي ...
يعني مثلا ، لو قالو لج لازم تشطفين الماسك بماء دافئ ، غسليه بماء دافئ لا تغيرين على كيفج
لأن من جد ترى هالأشياء تفرق


+ شمو ريحة الشي اللي بتشترونه ، ترى بضاعتهم فيها ريحه قويه ، سواء حلوه أو مو حلوه ..
ريحتها نفاذه ، ولو شي يستخدم مع الماي ، طلبو من البائعين يجربونه لكم مع الماي علشان تشمون ريحته
لأنها راح تصير مختلفه بالتفاعل مع الماء
وعلى كثر ما أغراضهم ريحتها تهبّل ، ترى في أشياء عندهم ريحتها مو حلوه لأنها من مكونات طبيعيه
أما أملاح الأستحمام والرغوه والشاور جل .. كلها ريحتها حلوه

اللي لاحظته ، أكثر المنتجات اللي ريحتها مو حلوه : أقنعة الوجه الطازجه (مو كلها طبعاً ) و المقشرات


+ بالنسبة للأسعار ، الحلو عندهم أن كل شي مسعّر ، يعني تقدرون تتوقعون كم بتطلع فاتورتكم
أحسن شي في المحلات الأجنبيه ، لأن من حقوق المستهلك عندهم أنه يعرف السعر قبل لا يشتري
عكس عندنا الود ودهم ما يعطونج الفاتورة !!!
خصوصاً محلات المكياج والعطور ، ما عدا سيفورا ، هم الوحيدين اللي بضاعتهم عليها سعر
بس طريقة العرض والريحه في المحل لا تقاوم .. وفي عندهم وايد شغلات
لا تحتارون .. المهم أنكم تعرفون شنو عندهم , وتختارون اللي يعجبكم





تصبحون على ريحه منعنشه