January Empties أشياء خلصتها خلال شهر يناير

مراحب ~


شلونكم ، شخباركم ، كيف حالكم ، كيفكون ؟؟ ... بكل اللهجات

الكل يعرف المثل اللي يقول (حشر مع الناس عيد)

وانا لاحظت ان كل المدونين قاعدين يطرحون الشي اللي بطرحه اليوم

مو مسألة تقليد ، لكن لما فكرت في الموضوع لقيت أنه فعلا مفيد

يعني بدل ما يصير في ريفيوهات وايد على كذا شغله

أكتب لسته بالمستحضرات اللي خلصتها ، وتعليق سريع عليها

من غير التعمق الممل ، بحيث أضرب عصفورين بحجر

أولهم أعرف الناس على شغلات ممكن ما كانو يعرفونها ، وبالتالي يستفيدون

وثاني شي ، بقول رايي السريع فيه ، سواء حلو أو مو حلو




يالله نبلش ~







مقشر الوجه من سيسلي Crème Gommante Sisley

مقشر عادي ... ما عطاني أي فايده ، ولا شفت ويهي تغير من استعملته
رغم أن سعره غالي ، لكن ما جنيت منه أي شي ...
في نفس الوقت ما ضرني ، طبعا هذي تجربتي انا ويمكن ناس يعجبهم
ما راح ارجع اشتريه مره ثانيه ، بس هالتجربه ما غيرت نظرتي لشركة سيسلي
لأن معظم منتجاتهم رووووعه وراح استمر استعملها



كريم اليدين الليلي من دوف
Dove Regenerating Nourishment hand cream / Deep Care Complex

حلو ، يمشي الأمور ... الصراحه كريم اليد من الشغلات اللي استهلاكها قوي
يعني بشكل يومي ويمكن لأكثر من مره في اليوم ، لاحظت إني قاعده أبالغ
في استخدام الكريمات الغاليه ، يعني كل اسبوعين اشتري ، فقلت خل أجربه
هو يستخدم بس في الليل كترطيب مكثف وإعادة التوازن
في الفترات اللي انسى فيها نفسي خلال اليوم أحطه في الليل قبل لا أنام
يدي تتحسن الصبح ، ترطيبه زين
أكيد ما راح أوقف الكريمات الثانيه اللي استعملها ، يعني الصبح كريماتي الأساسيه
وهذا في الليل
لكن على الأقل راح تظل عندي فتره أطول





تونر للوجه من كلارنس

Clarins Toning Lotion With Camomile

للأسف عااادي جدا ، ما فادني ولكن ما ضرني
لكن المشكله أن الواحد يصرف فلوسه علشان يستفيد
مو علشان مستحضر ما يعطي فرق ... ترى هو للبشرة العاديه إلى الجافه
رغم أن بشرتي دهنيه لكن ما أحب آخذ التونرات القويه
أحاول دايماً أشتري الأنواع اللي للبشرة العاديه علشان ما يصير فيها جفاف
صحيح أن التونر ماله دور علاجي فعَال ، إلا أنه ينظف المسام و يهيئ البشره لامتصاص الكريم
ما برجع اشتريه مره ثانيه ، رغم أن مكوناته زينه [ بالكاموميل (البابونج) وخالي من الكحول ]
قد يكون السبب أنه لنوع بشره مختلفه عن بشرتي .. جايز ..
لكن لاحظو إني أحب كلارنس ومستمره على كذا شي من عندهم





لوشن مثبت للترطيب للجسم من فازلين
Vaseline Intensive Rescue Body Lotion

الحمد لله أنه خلص  ...
اخترته لأنه غير معطر قلت أغير شوي ، لأن معظم كريماتي مع ريحه
أحياناً أحب أتحكم بريحة الجسم ، يعني ما أبي عطر يطغى فوق عطر ويصير فيه لخبطه..
مكتوب عليه أنه يقلل من حدوث الحساسيه ، للأمانه ما هيج البشره ولا حسسها حسب الوصف المذكور عليه ،،
لكن طلعت ريحته أقوى من أي كريم معطر عندي 
مو عطر حلو ، لأ ... نفس ريحة المستشفى أو الأدويه ، على منظف الأرضيات
أزعجني وانا استعمله ، لكني ما أحب أرمي أي شي ، كنت أحطه في الليل
لا وأسمه انتنسف ريسكيو
كلمة ريسكيو معناها "إنقاذ" وانتنسف يعني "مكثف" ..
لاهو علاج مكثف ولا شي ، ولا مره من استعملته حسيت بترطيب قوي في جسمي
كان يحسسني بالبرد

 كأني كابه ماي على جسمي من زود ما هو سائل و بطيء في الامتصاص
تهقون من برودة الجو ؟؟ ما اعتقد
أكيد عرفتو اذا برجع اشتريه أو لا ، ما يحتاج أقول





كريم مرطب للوجه من كلينيك
Moisture Surge Extended Thirst Relief

هالمرطب حلو ، بين فتره وفتره ارجع اشتريه لأنه يسعفني ،
خفيف وحلو ويعطي البشره كميه الترطيب في الأوقات الجافه
من كثرة المكيفات أوالرطوبه ، الشمس أو جفاف الشتاء ، دايما ينفعني
هو عملي وسعره مو غالي ، فأستخدمه بالتناوب مع كريماتي اليوميه ، أو مرات قبل النوم ... تمتصه البشره بسرعه ومو دهني






عود مبخر من أجمل

العود داش وسط الموضوع  ...
ذكرني بإفتح يا سمسم (فواحدٌ مُختلفٌ ، لا ينتمي لهذه المجموعةِ) 

 هذي يمكن عاشر علبه أخلصها ، استخدمه من 7 سنين تقريباً
أحبه وايد ، يمكن لأني لما اشمه استرجع ذكريات حلوه من أيام مراهقتي
دخلنا في التحليلات النفسيه .. قيد الاستمرار في الشراء










مرطب للشفاه من ديور
Dior Addict Lip Glow Color Reviver Balm


بكره إن شاء الله بروح اشتري واحد بداله ، لأني أتعب وانا اقول أحبه أحبه أحبه 

 لما أحطه ، كل شوي أحاول أذوق طعمه ، وريحته تهبل ~ تحسس بالرفاهيه
لأنه فعلا شي مميز ، يعطي لون وردي خفيف وينعم ملمس الشفايف أكثر وأكثر






وبس والله ، خلصت

ترى عطيت رأيي الصريح في كل شي ، قد يكون في شي الناس يستعملونه ويحبونه بس أنا ما عجبني

و هذي تجربتي الشخصيه ، مو قاعده أحببكم أو أكرهكم في أشياء معينه ...
والأذواق تختلف




أشوفكم على خير