Advanced Night Repair II Estée Lauder سيروم إستي لاودر أدفانسد نايت ريبير

مساكم الله بالخير ..
في جعبتي اليوم ريفيو ، عن سيروم صارت عليه ضجه كبيره
مادري إذا سمعتو عنه أو لا ..

 

 

 

Advanced Night Repair Serum II
سيروم العناية الليلية الفائقه أو (المركزه) من ايستي لودر II


لاحظو ان في شخطين في الأسم ، عباره عن رمز 2 بالأرقام اللاتينيه
يعني هذا هو الإصدار الثاني من السيروم ، كان في واحد قبله بنفس الأسم
لكن هذا فيه تغييرات جذريه عن أول واحد ...

يقولون أنه يشتغل بتقنيه تحفز الخلايا على تجديد نفسها بالضبط في الوقت اللي يصير فيه إعادة بناء في الليل ...

في البدايه ، هل السيروم له أهميه مثل ما شركات التجميل قاعده تروَج ؟
للي ما يعرف شنو السيروم (قد يكون البعض ما مر عليه) لذلك نحترم الكل ونوضَح ...
هو مستحلب بقوام كثيف يميل إلى الجل (Gel) ، يستخدم قبل الكريم
وله مفعول علاجي ومكثف ، يتغلغل إلى الطبقات العميقه من البشره ويعالج مشاكل معينه
كل سيروم حسب استخدامه ومواصفاته
معظم الشركات أصدرت سيروم ، وسعره في العاده أغلى من الكريمات
ما ننكر أن في تسويق قوي لـــ"صناعة" احتياجات جديده
عن طريق إيهام الناس بأن بعض المستحضرات ضروره لا بد منها !!

يعني قبل كم سنه ، ما كان أحد يعرف السيروم ولا يستخدمه ، أصلاً ما كان موجود
بذكاء وشطارة الشركات ، قدرو أنهم يقنعون البنات والسيدات على حد سواء ، بأن السيروم منتج أساسي

وهذه الطريقة متبعه بدون شك لأن همهم الأكبر هو زيادة المبيعات
لكن ... نقف عن السيروم ،،

بالنسبه لي ، فعلاً يسوَي فرق واعتبره شي أساسي ما استغنى عنه

أصلا صرت أعتمد عليه أكثر من اعتمادي على الكريمات ،
يعني ممكن استخدم كريم مرطب عادي مافيه أي مميزات

لكن السيروم يعطيني أفضل مفعول ولذلك أحرص عليه

بالنهاية كل وحده تحكَم عقلها
بالنسبه لي أحس إني اقدر اكتشف ألاعيب شركات التجميل
وأوقف عند أي مستحضر أحس انه ماله أي أهميه ولا فايده ...
لا وألف لا !!!
ما تقصون علينا

والكل حر سواء حب يستخدم السيروم أو يكتفي بالكريمات ..

نرجع لسيرومنا
مواصفاته حسب الشركه المنتجه (ايستي لودر) :
يناسب جميع أنواع البشره
مضاد للتجاعيد
يعزز تجانس البشره ونضارتها
يخفف التصبغات الجلديه
يقلص من تأثير الذرات الحره على البشره
يزيد من ترطيب البشره

 

 

 

 
رأيي فيه : صح ... جميع المواصفات اللي فوق تحققت عندي ،
ما عدا التجاعيد ما اقدر أحدد لأن ما عندي
لكن حسيت ان ملامحي صارت مرتاحه أكثر

طريقة الاستخدام : من أسمه ، المفروض أنه معالج خلال الليل ...
يعني بعد غسل الوجه أحط كم من قطره في يدي
وعن طريق تقنية الطبطبه الخفيفة (Patting) بأطراف الأصابع
نوزع السيروم على الوجه والرقبة بدون ما نسوي مساج
ما نبالغ بالفرك بس نمرره ، وهو بروحه بيتسرب للبشره



 

موظفة المبيعات قالت لي أقدر استعمله الصبح والليل يعني مرتين في اليوم ..
فكرت أسويها ، بس غيرت رأيي ، قلت أخليه بس في الليل حسيت أناستعماله مره واحده كافي
لأني أصحى من النوم بشرتي تكون مرتاحه

بالنسبة لملمسه ، دهني إلى حد ما ، لكن المفروض أن هذا يكون قوام السيروم ..
والحل : استخدامه بطريقه صحيحه
يعني وضع قطرات بسيطه راح يكفي ولا تنسون الطبطبه بخفَه
وأهم شي الخطوات قبل لا تحطونه ، أن الوجه يكون مغسول والتونر مسحتو فيه البشره علشان يتشرب بسرعه

انا ما استعملت سيرومات وايد ، اللي استخدمتهم كالآتي:
من لانكوم Genefique
من كيلز Midnight Recovery Concentrate
من كلارنس Double Serum (عن طريق السرقه والاحتيال على ممتلكات الوالده)
من شانيل Sublimage

ومافي ولا واحد منهم مو حلو .. لأني صج استفدت منهم
ولو في يوم توهقت وعندي مناسبه أو شي مهم وكان ويهي في وضع تعبان
[في النهايه احنا بشر وتمر علينا أيام صعبه بعض الأحيان ، أو بسبب الكسل]
أقوم أحط ماسك ... وأزيد شوي من السيروم وأنام من وقت
وثاني يوم أكون تخلصت من مشكلة "تعب القسمات"
" أبرا كادابرا "
ســــحــــر


ما أقدر أقول أنه أحسن واحد من اللي استخدمتهم ..
كلهم زينين
لكن الميزان يميل لكفته لحد ما ،
للأسباب التاليه :

+ هو فعلاَ شامل ويناسب جميع أنواع البشره
ويعالج جميع مشكلات البشره
يعني يشتغل على التجاعيد والبقع وتناسق البشره والترطيب

+ نتيجته (بالنسبة لي) ملموسه ، يعني عادي لو وقفته كم يوم ورجعت أحطه ، من أول يوم ألاحظ الفرق

+ ما سوى لي إحمرار وحكه ، ترى يقصون عليكم اللي يقولون لكم
لما تحطون كريم ويصير وجهكم أحمر أو تحسون بحراره
معناته أن الكريم قاعد يشتغل
هالكلام مو صحيح
لما يصير هالشي ، معناته أن الكريم قاعد يسوي لكم حساسيه وتهيج
هالكلمه قالها قدامي خبير شركة سيسلي (Sisley) وأنا عمري 16 سنة وكنت مع أمي
ولحد اليوم ما نسيت كلامه ، راسخ في بالي !
المفروض تحسون أن الكريم بارد وبشرتكم منتعشه


إن شاء الله بحاول أسوي ريفيو عن كل السيرومات اللي استعملتها تدريجياً
بس مو ورا بعض علشان ما تتمللون



ولنا لقاء بإذن الله
مع موضوع آخر