زيت الجسم (مارشميلو) من مستحضرات (مور) MOR COSMETICS Marshmallow Body Oil

MOR COSMETICS
Marshmallow Body Oil


زيت الجسم (مارشميلو) من مستحضرات (مور)

و ضحكت لي بشفةٍ مثل الشفقْ ... حسها قلبي وحنٌ لها وخفَق
واسبلتْ لي طرف ذوّبني غشيتْ ... في شَديد البَرد نضّحني عَرق
ما دَريت وين قلبِي ما دَريتْ ... ما دَريتْ ان قَلبي انسَرقْ

  حبيت أمسي عليكم بهالقصيده الزينه ...
تستاهلونها يا جميلات كلكم




اليوم انا عندي الشي اللي خلا قلبي ينسرق
شرايكم في هالسجع والتشبيه البليغ !!
معشوق قلبي ، هذا الشي الرومانسي الجميل

هو عباره عن زيت للجسم ، لكن مو زيت عادي
عباره عن كوكبه من الورود تهوج وتموج في بعض ،،
وله خواص مرطبه ايضا

 


المواصفات لزيت الجسم الجميل اللي بتكلم عنه اليوم كالتالي :


اسم الشركة المنتجه : Mor Cosmetics شركة استراليه ..
يا عيني يا عيني طايحة على منتجات استراليه
ولا مره شفت احد كاتب عنه اي شي في العالم العربي كله بالمره

ولا اي احد يعرفه



لكن طبعاً ، في شمواه الوضع " غـــيـــر"
محد يكتم على الثاني العلوم
كلنا خوات وحبايب ... نتشارك مع بعض

و ليش ما اقول لكم ! يمكن يعجبكم ويصير من أحلى الأشياء بالنسبة لكم مثلي وبعدين تدعون لي إن شاء الله ...

رغم ان اسمه Marshmallow ، عجزت الاقي أي شبه بين ريحته و بين ريحة الــ Marshmallow
يعني الحلوه القطنيه (ما اعرف شنو اسمها بالعربي)
ترى ما ا حب الروائح السويت (اللي تقلب على ريحة سكريات أو فاكهه) ما عدا الماندرين يمكن (اليوسفي) ..









هو يتكون من زيت الورد وزيت السمسم والعنب و جنين القمح ، بالإضافه لفيتامين E
والأهم ، انه خالي من البرابين والسولفيت
نغماته فيها ياسمين ومسك وورد ، وماله اي علاقة بالحلوى مثل ما ذكرت ...
ودافئ جدا ، يعطي لما احطه أحس بهدوء وراحة
هو يجي سائل في الزجاجه الشفافة هذي
وعن طريق البخاخ ترشين فيه على جسمج ، مثل العطر بالضبط
يعني استخدامه من اسهل ما يكون ، ما يلعوز اليد ولا ينسكب
غير دهني يمتص خلال دقايق ، لكن الريحه عادي لو اقول تظل ايام
طبعا مش في الجسم ، لأن بيروح مع الاستحمام
لكن الملابس اللي كنتي لابستها لو ترجعين تشمينها بعد يومين بتلاقين فيها ريحته
رشتين فقط منه كفيله بقلب ريحة الغرفه









تعجبني هالشركه كل اغراضهم حلوه
المجموعه كامله كانت موجوده عندي لكن ما رجعت شريت كل شي رغم انهم حلوين
يعني في كريم ومقشر للجسم وشاور جل واكسير للبانيو ومرطب الشفايف واعتقد غسول لليد بعد
الزيت هو اكثر شي تعلقت فيه ...
لأن باقي الاشياء موجود منها ، بس الزيت مميز بمواصفاته هذي
يعطيني احساس بالدلال والرفاهيه ~ شرايكم في دعاية الجالكسي
ترى في عندهم مجموعات وايد بروائح مختلفه ، ومعظمهم حلوين



مشكلته الوحيده هي : عدم تواجده السهل في متناول اليد
الدولة الأم هي استراليا والمحلات منتشره في الشرق الاقصى مثل اليابان، تايوان وسنغافوره
ومن بعدها موجود في امريكا وبعض دول اوروبا
للأسف ما عندي فكره اذا موجود في السعوديه او الكويت او قطر او عمان ..
في البحرين على الأكيد مهب موجود ... وكذا مره احاول اشتريه أونلاين ما يوصلونه لأنه سائل


انا اشتريه من الامارات حبيبة قلبي وموجود في دبي في هالأماكن :

Bloomingdales (بلومنغديلز - دبي مول)
Harvey Nichols (هارفي نيكلز - مول الإمارات)
Back Stage (باك ستيج - جميرا)


يعني ممكن تروحون هارفي نيكلز في السعوديه أو الكويت ، ولو لقيتوه خبرونا
لكن لاحظت ان ما عليه احد ، يعني اول مره اشتريه كانت في 2010 ،
وقتها المجموعه كامله كانت موجوده ومتنوعه
مره عن مره اروح الاقي الاشياء في تناقص ... بسبب ضعف الاقبال
لكن انا ما اهتم لو الشي مهب مشهور ومحد يروح عليه ، يعني لازم الكل نسخ ولصق نقس الطقة
لابد ندور على الشي المميز حتى لو ماكان معروف
عاد اليوم اكتشفت ان باقي عندي منه 3 حبات
وكنت افكر بس واحده باقية
طلعت فاتحتهم كلهم وحاطه من كل واحد شوي بس تخربطو مع بعض
لقيت الثلاث قطع اليوم وخليت لي واحده بس برا ، اما الثنتين الباقيين شلتهم في بوكساتهم











حجم الزجاجة الواحده : 100 مل 100mL
سعره : 20 دينار (200 ريــال/درهم)

اتوقع انه يناسب جميع الاذواق ، لان كل اللي يشمه يقول لي شنو حاطه
للأسف يمكن ما راح يستفيد من هالتدوينه إلا اللي ساكنين دبي (في حالة ما لقيتوه في الاماكن اللي ذكرتها)
لكن جربوه قبل لا تشترونه

بالرغم من انني متأكده انكم ستقعون في غرامه مثل ما حدث لي

ومع هذه الجملة الخاقوقيه ، اختتم فعاليات تدوينتي لليوم