Hi ~
سبق وتكلمت عن زيت الكيوتيكل من أو.بي . آي من مجموعة آفوبليكس
(بتحصلون الموضوع في المدونه هذه نفسها – قبل بكذا موضوع)
اليوم اخترت لكم شي جديد نزل من نفس هذه المجموعه
وهو كريم لليد والأظافر
كريم غني ، معناه كمية بسيطه منه تسوي مفعول كبير ، وتعطي ترطيب قوي
وقوامه كثيف وريحته حلوه وخفيفة
تغلب عليها ريحة الزهور الحمضية والروائح العشبية ، مثل اللي تشمونها في الحديقة
والحلو أنها ما تلصق في اليد ، يعني بعد ما تدهنونه تفوح الريحة بس شوي وتختفي
[ رغم تعلقي الشديد بالعطور ما أحب ريحة يدي عطر ]
أحبها تكون ريحة كريم الأطفال الخفيف (ممكن) أو ريحة نظافة بس
مكونات الكريم : عبارة عن مزيج من زبدة الكاكاو الأفوكادو واللوز
غير دبق ، ما يدهن على اليد وسريع الامتصاص
و مو نفس الكريمات اللي تكون خفيفه (نستخدم في البحرين مصطلح ماي مايو ) يعني ماي سائل
مع استعمالي لمدة اسبوعين ، لاحظت فرق شاسع في ملمس يدي
إحساس حلو .. خصوصاً أنه يتغلغل وايد في الأظافر
بس ممكن أنه يطفي اللمعة الموجودة في صبغ الأظافر (أو التوب كوت)
الكريم مرمم من الدرجة الأولى ، حرام خادمتنا يدها متنتفه حطيت لها منه صارت يدها عادي ولا كأن فيها شي
كل آثار البقع والجفاف تختفي بسرعة ..
بالنسبة لي ، أعتبره كريم 5 نجوم
و رغم أن في تخوف من بعض البنات من أنهم يشترون من الماركات هذي
ظناً بأنها مبالغة في السعر ... أنا ما أشجع أبد على الإسراف ، وأزعل إذا صرفت فلوس بدون فايده
طبعي كأي طبع الإنسان العادي العاقل .. مو مجنوني الشراء واللي عندهم هوس
وكأنما محصلين الأغراض في الشارع ...
لكن اللي عنده تفكير سليم ، يقارن .. الحين كريم اليد العادي من أي شركة
أو حتي "هيمالايا" اللي ما يسوى بيزه (في نظري) سعره دينارين (20 ريــال/درهم)
وحجم البعض منهم 50 مل ، أو 75 مل
كريم أو . بي . آي هذا اللي قاعده أتكلم عنه ، سعره 2.8 دينار (28 ريــال/درهم) تقريباً ،
قد يكون في إختلاف في السعر حسب الدول
وحجمه 50 مل
غربلتكم صح
أقوم أقارن بين الحجم والسعر والفايدة ...
مجرد قاعده أشرح لكم طريقة ذكية تقدرون تفكرون فيها لما تحبون تشترون شي
وبناء على شنو تقدرون تقارنون بين الموجود في السوق
ترى عندي كريمات دوف ونيفيا وغيرها اللي ينباعون في السوبر ماركت ،
بس أحاول أوصل لكم الفكره اللي أتبعها لما أشتري الأغراض
وحبي وإعجابي بهالكريم من أو.بي.آي ، ما يعني إني راح استعمله على طول
لأ .. أقعد أجرب اللي بعده واللي بعده ، لي ما أحصل الأحسن منه ثم اللي أحسن
بعض الأحيان لما أيئس من كل شي ، أرجع للأشياء الزينة اللي كنت مستخدمتها من قبل
وهكذا
وكل واحد حسب استطاعته ، بس ضروري ضروري كريم اليد
علشان ما تتبهدل قبل الأوان ..
No comments:
Post a Comment