November Favorites مفضلاتي لشهر نوفمبر

 

 

 

مساء الخير

 

التدوينة اليوم راح تكون مفضلاتي في الفترة الأخيره ,,,

 

فكرة اني اعرض مفضلات لكل شهر مب داخله مزاجي ، ولاحظت ان البلوقرز يسوونه كل شهر

لكن احس بصراحه ان عرض المفضلات بصورة شهرية مبالغ فيه وغير منطقي

احسه يشجع على نزعة استهلاكية كبيرة بين البنات والسيدات ..
 

يعني هل لازم كل شهر يكون عندي فاونديشن مفضل !! وكل شهر كريم غير و حمره غير وعطر غير !

لا طبعا .. لأني استخدم الشي بأدنى حد لمدة شهرين الى ثلاثة شهور على ما يخلص

 

 

 

 

وفي اعتقادي ان البلوقزر الاجانب استعملوها اكثر كوسيلة تسويقية لعرض المنتجات الجديدة

لكني اشوفها ما تناسبني ، مع احترامي لكل اللي يحطون مفضلات شهرية ، بالتأكيد الخيار راجع لهم

 

في تدوينتي اليوم ، بتشارك معاكم في الأشياء اللي حبيتهم مؤخرا في خلال الشهرين اللي طافو

ومو شرط يكون شامل لكل المنتجات يعني من كريم الى شامبو الى عطر ... لأ ، راح تكون الأشياء اللي حبيتها بشكل عام 

 اعتبروها مفضلات شهر نوفمبر بما ان احنا في نوفمبر :)
 

ويالله نبدأ ...

 

 

 

عطر تان دو نيج - دار لورينزو فيلوريسي

 

Teint de Neige - By Lorenzo Villoresi

 

 



 

 

على رأس القائمة ، عطر من شركة لورينزو فيلوروسي واسمه تان دو نيج ، وترجمة الأسم من الفرنسية تعني (لون الثلج)

اللي عندي وصيت عليه من الرياض من بوتيك لودوريه للعطور في هارفي نيكلز الفيصلية لأنه لحد الحين مب موجود في البحرين

لكن سمعت انهم بينزلونه جريب عندنا ..

 

ريحته تشبه لريحة بودرة التلك ، لكن مب 100% ، يعني يدخل معاها روايح ثانية مثل المسك ، زيت اللانغ لانغ والتونكا

تم اصداره سنة 2000 م لكن ما انتشر في الخليج وانعرف إلا قبل 5 سنوات تقريباً

 

اللي عندي او دي تواليت ، لأني ما شددت شنو النوع اللي ابيه بس قلت ييبوه بأي طريقة

لكن تفاجأت ان رشه واحده بس منه تنتشر وتكفي ، وتثبت لمدة طويله

يوم العيد الصبح رشيته على فستاني ، وعلى طول قبل الغدا غيرت ملابسي وشلت الفستان في الكبت

بعد يومين وانه افتح الكبت وللحين الريحه ما راحت ..

واهم شي انه ما يعور راسي ، يعني احس ان ريحتي تينن ومنتعشه ونظيفه على بودره لكن الناس ما تدري شنو بالضبط

ما يعطي الانطباع مثل العطور الفواحه اللي تصك الراس

وهذي اكثر شي احبه ، احب ان الناس يشمون ريحتي بشي مميز بس ما يحسون مباشرة بالعطر

 

انا شبه متأكده انه ما راح يكون بالنسبة لي هبه او (موضه) بما ان كل الناس هابين فيه

حاله حال عطر شاليمار بالنسبة لي ما استغنى عنه

سعره : مب متأكده لأن اللي يابوه ما رضو ياخذون مني فلوسه

لكن اللي اعرفه انه يتراوح بين 500 الى 600 ريال

 

ترى العطر من فلوس صديقتي الخاصه وماله علاقة بأي دعايه ، يعني ما قاعده امدح العطر على الفاضي

لو حابين تطلعون اكثر على البوتيك اللي يبيعه ، هذي هو رابط انستقرامهم  لودوريه

احس انه عالم الأحلام .. ان شاء الله هالمره لو رحت الرياض اول شي بروح عندهم

 

كريم لليد من مولتن براون - بعطر النارانجي
Molton Brown Hand Cream - Naran Ji





متوفر بكذا عطر ، انا حبيت النارانجي (معناه برتقال باللهجة الهندية) وفيه عامل حماية من الشمس SPF15
ريحته نيرولي على ياسمين ريحته جميله وخفيفه ، والنيرولي معروف انه يستخرج من زهرة البرتقال
ما عمري حبيت استخدم كريمات اليد اللي فيها حماية من الشمس لأنها تطلع ريحه سيئة تزعجني
وبعد تسوي لون كأني حاطه كريم اساس في يدي ، وتلصق وتدبق
هالكريم ما عطاني شعور بالأشياء اللي تضايقني وريحته لطيفه

 من لندن ، سعره تقريبا 13 باوند (حول 6 دينار - 60 ريــال/درهم)
لكنه متوفر في البحرين في محلات ساكس Saks Fifth Avenue

 

حمرة ماك  - سيروب 
  " Mac lustre lipstic in "Syrup




اللي يشوف اللون يفكرها غامقه ، لكنها خفيفه على الشفايف
تعطي اللون الوردي القاتم المائل على البنيات وترطب ، ما تنشف لي شفايفي ابدا
استعملها من ايام المدرسة ولا عمري مليت منها ، وما قط تكلمت عنها قلت راح حطها ضمن المفضلات
لون محايد ومناسب للصباح والمساء بتغيير بسيط في المكياج

السعر 11 دينار بعد الارتفاعات المتكرره من ماك



كريم معطر للجسم من امواج - اسمه ميموار
Memoir Body Cream by Amouage




كريم كثيف القوام بعطر شتوي ضمن مجموعة عطور
تنبيه : يعني هالعطر مب خفيف ولا باوردي ولا وردي

حاولت ارتبه بالخشبه واساويه علشان الصوره تطلع حلوه :) 
مثل ما تجوفون قوامه غليظ مهوب سائل ابدا
ونتفه منه بس نفته تكفي لا احد يتهور ويحط وايد ، والافضل استعمال عود خشبي او سباتولا
لا تمدون يدكم فيه اولاً علشان ما يخترب بسرعه ، ثاني شي كميته كبيره واكيد راح تخزنونه فما تبونه يتعفس ويخترب







بما ان دخلنا اجواء الشتاء ، طلعته من الكبت لأني ما استعمله غير في الشتاء للأمانه
احطه على مناطق النبض مو على كامل الجسم ، مثل الرسغين وثنايا اليد وخلف الأذن
وبعدين ارش العطر المعتاد واتبخر
اول ما احطه تراه ثقيل ثقيل وايد ( مررره مررره )  نغزه للسعوديات :)
لكن بس ينمزج مع عطري وريحة البخور ويبرد ، يعطيني اجواء فخمة
 خاصة للمناسبات او لما يكون عندنا ضيوف ، حتى لو كنت بس حابه اروق نفسي بنفسي في البيت
تطغى عليه النغمات الخشبية الحاره والعود ، هذه ثالث علبه اشتريها


مكان الشراء : محلات امواج في السيتي سنتر - وموجود محلهم في مجمع السيف بعد
وداخل باريس غاليري على ما اعتقد متواجد عندهم
السعر : 36 دينار (360 ريــال/درهم)
البعض ممكن يعتبره غالي وانا بعد اعتبره غالي ككريم ، لكنه كريم المناسبات بالدرجة الأولى وماهو للاستعمال اليومي ابدا





 

مناكير من اتش اند ام - اسمه : تي وذ ميلك (يعني جاي حليب)
H& M nail polish - in (Tea with Milk)





الاسم معبر ، لون بيج ناعم يذكرني  في لون جاز من ايسي ويعتبر بديل مناسب له
ثاني مناكير اشتريه من اتش اند ام ، مب سيء ابداً
ناعم ويتناسق مع الألوان الشتويه خصوصا الملابس المارونية
و مو شرط بس في الشتاء احط الوان غامقه مثل الأسود والأحمر القاتم
هاللون البيج مثالي لأيام الشتاء اذا استخدم مع الملابس والاكسسوارات المناسبة

السعر : اعتقد دينار ونص بس (15 ريــال)
من اتش اند ام





زيت اللوز الحلو للجسم من شركة ايفوليوديرم
Evoluderm Beauty oil with sweet almond

 

 

 

 

 

 

 

 

 

 

شريته من محل تاتي الفرنسي Tati في السيتي سنتر   

المحل يبيع منتجات فرنسية ويعتبر رخيص جدا
كل شي تتخيلونه موجود عندهم من كريمات وشامبوهات واغراض منزلية حتى ملابس لكن مب صوبي ملابسهم
احلى شي الكريمات واغراض البيت واعزكم الله الشرابات حلوه تدفي الرجل للشتاء

طحت على زيت بخلاصة اللوز الحلو من عندهم في قسم العناية ،  وكان سعره اقل من دينارين (اقل من عشرين ريـال)
هو يصلح للعشر والوجه والجسم لكن انا استعمله للجسم بس للأرجل واليدين
واحيانا اخلط نقطه منه مع كريم الترطيب العادي
اشوف ان ترطيبه ممتاز مقارنة بسعره ومكوناته حلوه


هذه كانت مفضلاتي في الفتره الأخير ، أو بالأحرى الأشياء اللي معلقه عليها
اي وحده من صديقاتي على الانستقرام او اي بلوقر حابه تسوي مفضلاتها انا اتمنى اشوف مشاركاتكم سوو لي منشن او تاق بليز
ولو احد منكم استفاد ولو شي بسيط ، اتمنى منكم انكم تشتركون معي بالمدونة من فضلكم

وعندي موضوعات جديدة قادمة ان شاء الله بتكون حلوه

بــــآي