Clarins Double Serum Review ريفيو - دبل سيروم من كلارنس

مرحباااا .. شخباركم ... اشتقت للتدوين

صار لي فتره ، وحالة الكسل مصاحبتني كلما افتح اللاب توب افرفر شوي واسكره ..
لكن اليوم قلت لااا ، شكلي طولت الغيبه ...


كنت مسويه قبل ريفيو عن سيروم ايستي لاودر ،
ووعدت إني اكتب سلسلة ريفيو عن كل السيرومات اللي استخدمتها
لاحظو إني مستخدمه كل سيروم على فترات مختلفه ، مو كلهم في وقت واحد
والريفيو بيكون موجود كمصدر أو Reference ،
اتمنى ان اي احد يستفيد منه في حالة حبيتو تجربونهم


اليوم راح اسوي ريفيو عن Double Serum من Clarins

 

للأمانه ، انا ما اشتريته ، اخذته من عند أمي
عندها كذا واحد لأنه هو السيروم اللي تستخدمه على طول
الفئة العمريه اللي تقدر تستعمل السيروم : بداية العشرينات




أول شي بتكلم عن استخدامي له ، وبعدين بقول لكم ليش قررت ما استعمله
السيروم فيه عشرين مستخلص نباتي – كعادة معظم منتجات كلارنس اللي يدخل في تركيبها نبتات عشبيه وزيوت طبيعيه
المكون الرئيسي هو Oxydendrum arboretum نوع من انواع النباتات تسمى Sorrel Tree
بالإضافه إلى خلاصة الموز الأخضر العضوي والكيوي وغيرها ...
خبركم هالشركات يصفون في هالمكونات
وما ندري مدى مصداقية وجودها أو تركيزها في المنتج ..
لكن الشي الزين أن في الغرب لابد من وجود مصداقيه في ذكر المكونات
وإلا صارت عليهم شكوى من الناس

مو نفس عندنا ، تشترون الزيت مكتوب عليه بخط اليد ،
وما في تاريخ انتاج ولا انتهاء

نرجع للسيروم ..

العبوه مقسمه إلى قسمين ، لما نضغط علشان نطلع المنتج يطلع من الصوبين ، بعدين نسخنه شوي بين يدنا
ونربت بضغطات متوسطه الشده على الوجه كامل
والي يحب ممكن يمسح على الوجه بالعرض ..


الاستخدام يكون مرتين في اليوم الصبح والليل ، حسب أغلب الشركات ما يكتبون
لكن ممكن نكتفي بالاستخدام المستمر مره واحده في اليوم ..



خصائص السيروم:
مضاد للتجاعيد ، معناه يمنع ظهورها
يخفف مظهر الخطوط الرفيعه للسيدات الأكبر في العمر
يضيف الترطيب والنداوه للوجه
ويقولون انه يساعد على منع الزياده المفرطه في التصبغات
ويحسن شكل المسامات



حسيت بعد ما استعملته لتفره ان ويهي صار فيه نضاره وصفاء بزياده ،
لكنه يميل للدهنيه أكثر من السيرومات اللي استعملتها قبل ..
يعني قوامه Sticky او لزج شويه ..
بعض المرات حسيت انه ثقيل على بشرتي
وصراحه وايد حسيت انه مناسب أكثر للأعمار الأكبر ، يعني فوق 35
علشان جذي قررت ما استعمله ، فقط لا غير 

 رغم إني شفت نتايج زينه لكن يلزمني فقط شي بسيط ما يكون قوي مثل هالسيروم
ومتى ما ابتدينا بمستحضرات قويه ، البشره بعدها ما راح تستجيب مع المنتجات العاديه
يعني ما راح تأثر فيها الكريمات أو السيروم الي تركيبتها أخف


وفي مره من المرات حسيته سبب لي تهيج ، يمكن مكوناته وايد قويه على ويهي
ما قاعده أذم فيه ، وايد سوى لي فرق بس اتوقع فهمتو قصدي ، حسيت أن ماله داعي استعمله حاليا




سعره : على ما اعتقد 42 دينار للخمسين ملي (420 درهم / ريــال )
مو متأكده بصراحه من السعر ، ممكن يكون 38 


حسب تجربتي معاه ، ما انصح اللي اقل من 30 سنه تستعمله

وان شاء الله في المرات الجايه راح اذكر باقي السيرومز اللي استعملتهم ..


مع السلامة