مقشر الجسم (سكراب) من شامبنيز Champneys Body Glow / Review

مساء الخير والإحساس والطيبة .. مساءً ما ، يليق إلا ، بأحبابي 

 عاد من فيكم مدمنة استحمام ؟؟
أحس روحي صرت مدمنةَ مقشرات الجسم والكريمات واللوشنز ، وخلافه من أدوات الاستحمام

جربت أشكال وأرنـــآق من السكرابز ،، لحد ما طحت على الحبيب 

 اللي بتكلم عنه اليوم ، هو مقشر للجسم من شركة شامبنيز البريطانية
يمكن ما قط سمعتو عنها
"شامبنيز" هو منتجع صحي أو (سبا) في بريطانيا
شغلهم حلو وايد ،
بس شكلهم قررو يطرحون مستحضراتهم للاستخدام الاستهلاكي في الأسواق
لأن قبل كانت موجوده بس في منتجعهم

أغراضهم لقيتها في صيدلية بوتس
لكن محد يروح صوبهم إلا أنا 

وهذي أكبر دليل ، إن مو شرط المنتجات المعروفه تكون الأحسن
لأن الناس تسمع عن شي تروح تشتريه .. وأنا بعد للأمانة نفس الشي
لكن ما نجازف ونجرب شغلات مو معروفه

بس ترى هو أشهر من نار على علم في لندن

شريت منه المقشر والكريم ، لأن كان عليه عرض تشترين واحد وتحصلين واحد مجاناً

يعني المقشر سعره 9 دينار (90 ريــــــــــــــــــــــــــــــــال/درهم)
وخذيت معاه الكريم ببلاش ..

ما احب أبالغ وأزيد من عندي ، لكنه بكل أمانه أفضل مقشر استعملته في حياتي
بعد ما استخدم الشاور جل ، آخذ شوي منه وأدلكه بحركات دائرية
على كامل الجسم ، من الرجل صعودا للبطن واليد ، واحب احطه في المنطقة اللي فوق الصدر بالضبط (ابتعدي عن الصدر) يعطيها نعومه عجيبه

ومايحتاج اقعد أفرك وأفرك بخشونه ، هو خشن منه وفيه وحبيباته قوية
بس يكون ضغطي متوسط

عاد أحلى لحظه
لما أجي أغسله بالماي ، بعد الشطف أحس فيه طبقة دهنيه على جسمي
والماي يتزحلق بدون ما يلصق على الجسم
معناه أنه حبس الرطوبه بعد
والريحه ولا أروع

من بعد ما عرفته ، ما اعتقد إني بغيره ، لحد ما أحصل اللي أحسن منه
أو إذا تمللت منه ، لأني ساعات أحب أغير الروائح لما اتشبع منها

وبس .. سلامتكم
صوّرته علشان تشوفون الملمس بس مو واضح ، اللي فوق المقشر واللي تحت الكريم

 

حمام الهنى