كريم العين "هايدرا لآيف" من كريستيان ديور - Christian Dior Hydra Life Eye Cream

العين مرآة النفس

من بداية التاريخ ، والشعراء يتغنون بجمال العين

وبأنها المنفذ الأول على النفس

لذلك ، كلنا نحرص على جمال العين ، ونحاول قدر الامكان الاهتمام بها

اليوم راح انقل لكم تجربتي [Review] مع كريم "هآيدرا لآيف" من ديور

 

 

من أسم المنتج ,, يتضح الغرض الأساسي منـه ألا وهو الترطيب

 حيث أي شي فيه (هايدرا) يعني ترطيب ,

وظيفة الكريم هي : إمداد النسيج اللي حول العين بالماء

وإزالة الانتفاخ والهالات الخفيفه فقط

الفئة العمرية اللي تستخدم الكريم هي العشرينات ...

حتى لو أكثر من العشرينات بالامكان استخدامه

لكن .. ما راح يعطي أي حماية من التجاعيد

لو كان فيه خطوط رفيعه ناتجة عن الجفاف حول العين

راح تخف وايد فقط لا أكثر

 بشكل عام ~

للحصول على نتيجة من كريمات العين ،، لا بد من استخدامها مرتين في اليوم

مره الصبح ومرة قبل النوم في الليل

ترى اللي تستخدمه يوم اي وعشره لا

بعدين تقول ما نفع معاي !!!

ترى ما راح تحصيلن اي نتيجة بدون الاستمراريه

اللي حبيته في الكريم :-

 

~ تمتصه البشره بسرعه

~ ريحته خفيفه ومنعشه ماهيب قوية  

~ غير دهني بطريقة انج تقدرين تحطين الماكياج فوقه بسرعه

~ سعره مو غالي ,مقارنة مع كريمات العين من ماركات ثانيه موازيه لديور

واعتذر لو اي واحده منكم بالنسبة لها هالسعر غالي وايد - 23 دينار هو سعره

يعني تقريبا" 230 سعودي/إماراتي/قطري

لكن لو تشوفون اسعار كريمات العين الباقية بتعرفون ان سعره زين

 

اللي ما حبيته في الكريم :- 

 

~ ما فيه خاصية الحماية من التجاعيد ، اللي لازم يبتدي مع بداية العشرينات

حسب آراء أغلب خبراء البشره (حسيت إني قاعدة أسوي إعلان)

علبته غير عمليه ، على شكل تجويف

فكمية كبيره من الكريم تكون مخشوشه وصعب تطلعينها بالسباتولا

~ يخلص بسرعه / ما يعوق بس شهر ونص تقريبا

هل راح أشتريه مره ثانية ؟

بصراحة لا ، لأن في كريمات عين استخدمتها من قبل عطتني نتايج أحسن منه

هذا ما يعني أن الكريم شين كلش طايح حظه

لا بالعكس ، زوين

بس أحب تكون العناية بمنطقة العين مركزة أكثر ... 

في النهايه طبعا ، كل واحده تجربتها ممكن تكون مختلفه

حسب عدة عوامل

لكن يبقى كريم العين من أهم الأشياء اللي لازم تفكرون في اقتنائها

لأن التجاعيد تظهر أول شي في محيط العين

بعدين ما ينفع معاها غير البوتكس لما تصير عميقة

لمحبي العناية بالأظافر ، ترقبو التدوينة القادمة ....