{انتفــــــــــــــــاضه جـمــــآليه}

بعيداَ عن الريفيوهات , التجارب , ومستحضرات التجميل ...
اللي في النهايه الهدف منها هوَ : البحث عن الجمال



كل بنت تتمنى أنها تكون جميله .. حتى الجميله تبي تزيد جمالها وتحافظ عليه
البعض ، يتمنى يتخلص من الوزن الزائد ، وبخسارة الأرطال الزائده يتحقق لهم الجمال المنشود


والبعض الآخر ، يحلم برقبة طويله .. أو أظافر طويله وجميله .. أو بشره ناعمه ملساء
إلى مالا نهــــايه ،،،
بغض النظر عن المفهوم المختلف لمعنى الجمال



بس مادامنا كل يوم نكتب عن الجمال 

 ونجرب مستحضرات تجميل ، ونتشارك مع بعض الآراء عن الحلول لمشاكلنا ..


لكن ، متى بتحققين حلمج ؟؟


لي متى التأخير والتأجيل ؟!


اذا كل يوم بس تدخلين تقرين في المواضيع ...
وعرفتي ان الصالون الفلاني عندهم تريتمنت للشعر ، والعيادة الفلانيه يسوون فيشل زين للبشره

بس تجميع في المعلومات بدون تطبيق


أبي كل واحده تقول شنو شعورها لما تسمع بيت الشعر اللي يقول :


{نص الجمـــــــــــال بوجههــــا وبعنـــقعها }


أكيد نتمنى أن الكلام يكون عنا ، وأنا أولكم


ونحلم ان تكون عندنا كل الصفات الجماليه ، على الأقل اللي تشبع ثقتنا وترضينا

من صفاء في البشره ، والمصطلح المعروف اللي أحبه واموت فيه (زبده) ..
عيون تلمممع ، أظافر نظيفه ومرتبه



طيب ، شنو اللي مانعنا أن نكون بهالطريقه ؟


مثلاً ، اللي عندها ذقن مزدوج ، شي بديهي ان جمال العنق راح يتأثر ..
لأن الدهون تقصّر الرقبه ، وتشوّه شكل الوجه ، ما تبيّن الملامح مرتاحه
بس بمجرد ما تذوب هالدهون ، يتغير حتى شكل الوجه

مع خالص احترامي وتعاطفي مع الجميع ، لأن ساعات هالشي يكون خارج عن السيطره
سواء لأسباب وراثيه أو هرمونيه ، أحياناً حتى الضعاف فيهم ..


وهالشي ينقلني للمحور الأهم في الموضوع !!


[ لاتقولين ماني جميله ... لو ماكان في جمال ، تقدرين تتعبين على نفسج ]

وهنا تكمن المتعه الحقيقية !!


نعم

حطي لنفسج كم من هدف واشتغلي على تحقيقهم
بس المهم ان تكون الاهداف واقعيه


مثال : اضعف 5 كيلو خلال شهرين

أعالج شعري واقص اطرافه / أو اسوي قصه - تسريحه مختلفه

أطول أظافري خلال شهرين ، علشان أصبغهم ويتغير شكل يدي

بحيث أن كل الأهداف تكون متزامنه مع بعضها

ولما تخلص فترة الشهرين

أطل على الجميع بـــــــ "نيو لوك " على قولتهم


بس العبرة ، ان الهدف يكون منطقي
يعني لو وحده وزنها مثلا 90 كيلو تقول هدفي اصير نحيفه مثل الفراشه ويصير وزني 50 كيلو خلال شهرين ،

هذا الهدف غير قابل للتحقيق ، لذلك لما يمر الشهرين وما تغير شي ، تترك كل شي


بس الهدف المنطقي في هالحاله = خسارة 10 كيلو خلال 3 شهور (مثلاً)

والفائدة بتكون :

- ارتفاع المعنويات
- في خسارة ملموسه للوزن صارت ونحاول نثبت عليها

- تحسن في الصحه

- تغيير ظاهر في الشكل


بعدين عادر ترجعين تحطين أهداف أكبر ..




بس الجميله من الأصل ، ما راح يصير فيها فرق كبير

(علشان ترفعون من معنوياتكم وما يصيدكم احباط)

بعدين الناس بتقول :

شلون كــــــــــــانت ؟؟
وشلون صـــــارت !!


انتفضي على الكسل والتأجيل والصوت المحبط داخلج اللي يقول لج ماراح تتغيرين
لابد من صرخه في وجه الحزن والاكتئاب والبكاء على (حظي الردي)
لأن مافي شي أسمه حظ ردي


(افتحي باب التفاؤل بالقدرة على التغيير )


مثال آخر لشعللة الجو
نبي هالقصيدة تنطبق علينا :



هذي اللي غلاها ما يبي قول قايل
هذي أسبآب غيضي والرضا والهيآم ..
يوم فلّت على الخصر النحيل الجدآيل

واستدارت خجل ، مدري تصنّع غرآم ..







شنو المشكله ، اجي اقول في نفسي ، أنا ابي أصير من "ذوات الخصر"

ما يبيلها شي ، شوية تمرينات رياضيه على اختيار صحيح للأكل على صبر

وهوووووب !!


تنبيه: رجاءً لحد يقول إني أشجّع على الحب وهالسوالف

يعني ما يصير ازواجكم أو خطيبكم يقول لكم هالقصيده ؟ لازم يعني قصدي (شخص غريب) !



هيا يا بنات يا حلوات
لنقوم بثورتنا على الكسل والملل والحزن
ونبدأ مشوارنا تجاه الجمال المنشود ..




بعدين عاد لا تتكبرون ،، ترى أهم شي جمــــال الروح