Lancôme Advanced GÉNIFIQUE Youth Activating Concentrate سيروم ادفانسد جينيفيك من لانكوم - ريفيو

Advanced Génifique Youth  Activating Concentrate – Review

سيروم ادفانسد جينيفيك من لانكوم  -  ريفيو

مرحبا ~

 

اليوم عندي ريفيو لواحد من السيرومز اللي استعملتهم ، سبق وطرحت ريفيو لاثنين من اللي جربتهم
وقلت إني بحاول أكمل سلسلة السيروم علشان تكون فيه عندكم اكبر مجموعة من المقارنات
وتقدرون تستفيدون من التدوينات هذه لمعرفة خصائص كل سيروم وتختارون اللي يناسبكم

طبعاَ راح تختلف التجربة حسب نوع البشرة وردة فعلها ،
لكن على الأكل الخواص العامة للسيروم وشنو المفروض يسوي لبشرتكم ما راح تختلف

السيروم لليوم هو من لانكوم .. واسمه "جينيفيك ادفانسد" 

 

 

سيروم للاستعمال اليومي قبل الكريم ، يستعمل مرتين يومياً الصبح والليل ، رغم ان كل السيرومز كنت استعملها في الليل بس ، لكن حبيت استعمل هذا في الصبح بعد لأنه خفيف وما يضايق

 

خالي من البرابين – السالفيت – الفثالات

يشتغل على علاج ترهل البشره ، زيادة المرونه او الإيلاستيسيتي (Elasticity) ، الخطوط الرفيعة ، النضارة والتصبغات اللونية

طبعاً هالكلام حسب تصنيف شركة لانكوم ، ولما نجرب المنتج نكتشف شنو بالضبط الأشياء اللي يقدر يسويها

تجربتي مع السيروم : بعد استعمال بسيط يمكن بمدة 4 ايام تحسن شكل بشرتي !!

تحول ملمس البشرة لنعومة أكثر والنضارة ملحوظه اكثر J حسيت ان ويهي مصحصح

قوامه غير دهني ويمتص بسرعة بدون ما يترك أي أثر يذكر،

 ريحته خفيفة جدا مافيها اي شي مزعج ، بل على العكس تحسين برفاهية وراحة

ما حسس بشرتي ولا مره وترطيبة متوسط

وبسرعة أقدر احط المكياج فوقة

 

 

من أكثر الأشياء اللي عجبتني فيه تصميم العلبة :

 عبارة عن علبة زجاجية لونها اسود ومعتم علشان الضوء ما يوصل للمكونات ويخربها

ما يحتاج تسحبين كمية من المنتج بنفسج هو ينسحب تلقائياً بطريقة التعبئة الذاتية في كل مره تسكرين العلبة .. شلون ؟

لما اخلص استخدامه ، اسكر العلبة فيقوم الغطاء يدور وتتعبى القطارة بكمية السيروم اللي لازم تستعملينها في المرة الواحد

وهي كمية كافية ، ما تضطرين تزيدين عليها .. وساعات انا ما استخدم كل الكمية ، فأعتبر التصميم ذكي واقتصادي جداً

ما عدا في النهاية لما يخلص ، القطارة ما توصل لقاع الزجاجة فاضطريت أميلها علشان أطلع الباقي

بالنسبة لي ما شكل عائق كبير لأن طول فترة الاستعمال الأمور ماشية تمام

 

 

 

 

السعر : حجم 50 مل – 42 دينار (420 ريـــال / درهم)

في حجم أكبر على ما اظن 75 مل سعره يمكن 55 دينار ..
وفي حجم صغير 30 مل بس يكون في بوكس مع كريم العين سعر البوكس كامل 38 دينار

 

هل برجع اشتريه مره ثانية : احتمال كبير وارد – المشكلة بس إني احب أجرب الشغلات اليديدة وما يكون في وقت

لأن استعمال منتجات كثير في نفس الفترة يهيج البشرة ويتعبها

 

باقي بعد مجموعة ثانية من السيرومات اللي استعملتها ما سويت عليها ريفيو ، بحاول قدر الإمكان أغطيهم كلهم

 

بــــــــــآي