My Simple & Clean Makeup مكياج طبيعي وبسيط بمستحضرات في متناول الجميع

 

 

 

مساكم الله بالخير ..

 

اليوم حبيت أشارككم مكياج بسيط و (نظيف) حسب ما أحب أعبر عنه

لأن بالعاده اتضايق من كثرة الألوان والمستحضرات اللي محطوطه على الويه

خصوصا لخبطة الآي شادوز هذه ما احبها ، أفضل يكون لون واحد بس على عيوني ولا أن الألوان تكون مو متناسقة

أو صايره حفله فوق العين ..

أما تكتل الفاونديشن وشكل المهرج ما احبه ابدا ..

 

 

 

 

 

وبالنسبة لكريم الأساس ، ما كنت استعمله ابدا .. واللي بعرضه اليوم هو أول كريم أساس اشتريه في حياتي

معقووووله !! ما حسيت أنا ان ما اعتمد على كريمات الأساس

 

كنت على طول بس احط بودره أو بودره مضعوطه أو بورده كريميه

وبعدين صرت اعتمد بشكل كبير على البرايمرز أو البيس والهايلايترز في تعديل السحنه وإعطائها نضاره أكبر

لكن أخيرا قررت اشتري كريم أساس .. واستعمالي له جدا خفيف نقطه بس ومب كل يوم

 

 

البوست بيكون خفيف ولطيف ، ما راح أكثر حجي علشان ما تتمللون

وحبيت أقول إني مب خبيرة مكياج ولا متخصصه ، كل شي تعلمته بنفسي وأحس إني أقدر استغنى عن مكياج الصالونات في المناسبات الصغيره من الأشياء اللي تعلمتها وأقدر أمشي نفسي فيها

ندخل في التفاصيل مباشرة

 

طبعا مثل ما قلت لكم هالمكياج هو اللي صرت اعتمد عليه في معظم الطلعات والزيارات حاليا ومرتاحه على الطريقة والخطوات اللي وصلت لها  ، الأشياء اللي بستعملها بسيطه ومتوفره في متناول الجميع

بدون أي تعقيدات ولا كونتورات النتيجه طبيعية وحلوه في نفس الوقت

 

 

أول ما اعرف إني بطلع مكان ،  من الصبح أو قبلها بيوم اقعد اشرب ماي وايد هههههه

مع ان اشرب ماي على طول بس عقلي الباطن مبرمج على هالحركة

وابتدي أولا بتهيئة البشره عن طريق السيروم ، كريم الترطيب + كريم العين

ترى مهما حطينا من مكياج والبشرة جافه كل شي بيخترب وما يطلع "نضر"

كريم الأساس بيتقشر ، البلاشر بينشف والحمره بتتقشر بعد  

 

 

 

الخطوة الأولى:

أخلط شوي من كريم الأساس مع برايمر مضيء على يدي وأوزعم على الوجه بضربات خفيفيه

وإتجاه التوزيع يكون على تحت

 

كريم الأساس : ميك أب فور إفر HD Foundation No. 130

البرايمر المضيء من بنيفت :  That Gal Brightening Primer - Benefit

 

 

الخطوة الثانية :

أوزع بودره مضغوطه من ماك على بعض المناطق ، ,وهي بودره شفافه جدا ومافيها تغطيه قوية

 وطريقتي تكون ضغطه واحده بس على المنطقة المطلوبه

عادة تكون حول الأنف ،على الجبين فوق الحاجب مباشرة ، ضغطه خفيفه على كل جفن منطقة الذقن وأقصى الخد قريب من الأذن

 

بودرة ماك سيليكت شير - رقمي   Mac Select Sheet / Pressed Powder    NC25 

 

 

 

 

 

 

 

 

 

الخطوة الثالثة :

أوزع لون واحد من ظلال العين من باليت نيكد 3 على الجفن السفلي ، وتحت العين بحيث ما يتناثر كله ، خط رفيع جدا

يعطي إناره غير ملحوظه لمنطقة العين ، يعني الناس ما تدري شنو اللي محطوط لكن الشكل العام يتغير  

اللون هو ثالث واحد من جهة اليسار في الصورة أسفل

 

اللون من باليت نيكد 3 من أربان ديكاي اسمه ليميت روز خفيف Urban Decay Naked 3 Paletter - Limit

 

 

 

 

 

 

الخطوة الرابعة :

ارسم خط بالأيلاينر السائل ، أحب يكون الخط رفيع ومقوس أو وينجد Winged على طرف العين

حاليا قاعده استعمل كحل من مجموعة ميك أب فور إفر من الأكحال الجديدة اسمه جرافيك لاينر

ارتحت له أكثر من كحل ماك السائل ، ريشته رفيعه والتحكم فيها أسهل

من ناحية الثبات ما جربته أكثر من ساعتين ، لكن بالنسبة لي الفتره هذه تكفي لأن  الزيارات والطلعات عندي ما تتجاوز المده هذه

وعن نفسي ما أحب الكحل المضاد للماء  

 

Make Up For Ever Graphic Liner

 

 

 

 

 

 

 

 

الخطوة الخامسة :

لمسات جميلة من الماسكارا العملية والحلوة ذي آر ريل من بنيفت ، أتوقع الكل يعرفها

سهله للاستعمال اليومي وتعطي مفعول حلو للرموش ، شكلها مافيه أي اصطناع أبدا رغم أنها تطول الرموش

 

They're Real Mascara - By Benefit Cosmetics

 

 

 

 

 

 

 

 

الخطوة السادسة :

أحمر الشفاه اللي ما رحمته ، مبين من شكله مخلص ... لون مشمشي على شوية وردي قاتم من مجوعة شين Sheen من ماك

يعطيني فريش لوك فوري بمجرد ما أحطه على الشفايف  .. اسمه " الترا دارلينغ"

 

Ultra Darling Lipstic - Sheen Supreme collection by Mac Cosmetics

 

 

 

 

 

 

 

الخطوة السابعة والأخيرة :

طاح البلشر في كل مكان وأنا قاعده أصوره ..  الحمد لله أنه الحجم الصغير وإلا كنت انقهرت وايد

أحط لمسات خفيفه على تفاحة الخد ، من بلاشر أو بالأحرى هو هايلايتر من جيرلان ، اسمه ميتيورايتس Meteorites

هو في الأساس عباره عن بوردة مضيئة تستعمل في مناطق الهايلايت

أنا احب استعمل الدرجه هذه كبلاشر أو أحمر خدود ، لأن اللون يميل للروز ويعطي لمسه سحريه أحبها وايد

طبعا يكون شي بسيط جدا علشان ما يلمع كل الوجه

 

جيرلان ميتيورايتس باودر - الرقم روز تينت 01

Guerlain Meteorites Pearls - 01 Teint Rose

 

 

 

ممكن استخدام اي نوع من البلاشر المتوفر عندكم واللي تحبونه

وأكيد أكيد ممكن تطبقون كل الخطوات هذه بأشيائكم الخاصه ، مو شرط نفس اللي استعملتهم أنا

 

 

 

اتمنى انكم حبيتو عرضي السريع للوك اللي معلقة عليه حاليا ..