ريفيو لغسول وجل الوجه للبشرة العادية/الدهنية من كيلز Kiehl's Ultra Facial Cleanser & Gel Cream Review

  

مرحبا 

 أول شي يسعدني ويشرفني قرائتكم لموضوعاتي
ولولا وجود اشخاص تقرا وتتجاوب معاي ما كنت تشجعت اكتب أي شي ..



اليوم راح اسوي ريفيو سريع عن غسول للوجه وكريم مرطب للوجه من كيلز Kiehl's
كنت ذكرت من قبل في مدونة خاصة عن شركة كيلز اني شريتهم من دبي
هالمحل احبه وايد وايد 

 وكنت مجربة المجموعة المخصصة لجميع أنواع البشرة (All skin Types)

ولما عرفت انهم نزلو المجموعة الخاصة بالبشره الدهنية قلت اجربها

وبما اني خلصت الغسول والكريم ، راح اذكر اليوم ردة فعلي على استخدامهم ..



1- غسول الوجه للبشرة العادية إلى الدهنية:
Ultra Facial Oil-Free Cleanser

... مادري شقول

علاقتي فيه علاقة حب / كره
الغسول عادي جدا ، رغم انه ممتاز من ناحية المكونات

خالي من السولفات (الكبريتات) ، السيليكون ، البرابين ، العطور والزيوت !!

صعب نلاقي غسول للوجه بالمواصفات هذه بسهوله

يعني لو كان خالي من السيليكون تلاقين فيه برابين ، ولو كان خالي من البرابين تلاقين فيه سولفات ..

لكن اللي ما عجبني فيه ابد .. لما ابتدي افركه على وجهي ، يصير ملبد وكأني قاعده اغسل ويهي بصابونة

بالضبط نفس ريحة الصابون ، اتمنى يوصلكم وصفي

وانا صغيره كنت كل شوي ادخل الحمام واغسل ويهي بالصابونة
طبعاً بعد ما اشوف دعاية دوف في التلفزيون

وكان الشعور لما الصابون يدخل في الخشم ويصير يحرق وفيه ريحة غريبة
ويسوي طبقة بيضا على الوجه .. هذا هو الشعور اللي عطاني اياه
ما هيج بشرتي ، وتنظيفه زين ..

اللي ما تنزعج من الشعور هذا ، اكيد بيكون ممتاز لأن مكوناته جدا جيده

ما راح ارجع اشتريه مره ثانية ، الغسول اللي من المجموعة الخاصة بجميع انواع البشرة كان افضل
هذا بالرغم من انه غير مخصصة لنوع بشره معينة




2- جل مرطب للوجه ، للبشرة العادية إلى الدهنية
Ultra Facial Oil-Free Gel Cream

مفعول خجول جداً جداً لهذا الكريم ، وحضور غير مؤثر ..

وجوده وعدم وجوده واحد

صحيح انا بنفسي اخترت الجل رغم وجود صيغة كريمية منه ، لأني بغيت شي خفيف

لكنه طلع خفيف بزيادة .. قد يكون الكريم افضل ما اعرف لأني ما استخدمته

و بعض المرات كان يترك مناطق جافة في ويهي
سريع الامتصاص وبدون اي ريحه مزعجه
ما يفرق عن كريمات نيفيا ودوف الي تنباع في السوبر ماركت .. توقعت منه اكثر

وارجع اقول الكريم الخاص بجميع انواع البشرة من كيلز كان افضل منه بمراحل

اكيد ما راح اشتريه مره ثانية

لمزيد من التفاصيل عن السعر وأحجام المنتجات ، تقدرون ترجعون للمدونة بعنوان : جديدي من كيلز

العينة اللي عطوني اياها كانت عباره عن التونر الخاص بجميع انواع البشرة ،

سائل كريمي وما ينشف الوجه ولا يسبب حساسية وفوق هذا منعش ومريح

لطيف جدا "Mild" واحسن من تونرات من ماركات غاليه استعملتهم من قبل



الظاهر انهم ما نجحو في اصدار المجموعة الخاصة بالبشره الدهنية حسب وجهة نظري

مجموعة الوجه لجميع انواع البشره كانت أفضل بالنسبة لي ، هذه صورة المجموعة

بعد النتائج السلبية ، ارجع واقول اني احب هالمحل

ووجود تجربة غير محببة لمنتجين ما يعني اني خلاص "بكنسل" عليهم

اتوقع هذه ميزه كبيره فينا احنا في العالم العربي ، نعمم الشين وما ننتقد بموضوعية

ما اقول اني ما بشتري من عندهم شي بسبب الغسول والكريم

وسيروم المعالجة الليلية من افضل الأشياء اللي استعملتها من عندهم وراح استمر في استخدامه 

ان شاء الله بسوي عنه ريفيو قريب ،

مع تدوينة جمالية أخرى لنا لقاء