بلشر فاين ون ون من بنيفيت Fine One - One Blusher by Benefit

مســـــــــــــــــــــــــــــــــآء الــخــــــــيـــــر
 

بتكلم اليوم عن بلشر من بنيفت / Benefit
اسمه
فاين ون ون Fine One - One
نسبة إلى (911) ناين ون ون ، وهو رقم شرطة النجده
يعني يبون يرمزون إلى أن أحمر الخدود (أو البلشر) هذا يساعدكم في ظرف دقايق
بدون حوسه ولا تعب
يعني المنقذ هههه


أول شي عجبني شكل علبته ، فمسكته بس علشان اتفحص شكله ... وألوانه فرايحيه تشد النظر
ماكان في ولا أحد عند الكاونتر فقعدت استكشفه بروحي وقريت شنو مكتوب عليه
بعدين مسحت مسحة منه على خدي وعجبني .. بدون تفكير قلت بشتريه
خصوصا أن البلشر مخلص من عندي .. ما أعرف شلون ما ترددت

 

مثل ما تلاحظون ، هو مكون من ثلاثة ألوان : لؤلؤي مائل للفضي ، وردي فاقع وبرتقالي (كورال)






المفروض أنج تمسكينه بالعرض على الخد
وتخلين الطرف اللي فيه اللون اللؤلؤي من فوق ( يعني أفتح لون يكون مباشرةَ تحت العين)
وتسحبينه تجاه الأذن ، بعدين تمزجين بحركات دائريه حسب الشكل اللي تبينه
العبره من وضع اللون اللؤلؤي فوق ، أنه راح يعطي إضاء خفيفه وحلوه للمنطقة العليا من الخد
أو ممكن أنج تحطين لون واحد بس من الألوان الثلاثه بحيث تنزلينه هو بس على خدج
أو تحطينه على اليد بعدين تمزجينه على الخد .. في كذا طريقة ، والنتيجة راح تختلف بقوة الضغط
يعني لو ضغطتي أقوى راح يطلع اللون بتركيز أكثر ، ولو مسحه خفيفه بالتالي بيكون اللون طبيعي أكثر
يعني مظهر منتعش بس بدون مبالغه وبدون ما يكون الوجه مليان غليتر ..



بس لاحظت شوي أنه يمسح البورده ، فالأفضل أنج تحطين رشه خفيفه من البورده بعده
لأنه قوامه كريمي ، لكن بالنسبه لي ما شكل لي أي مشكله أبدا ، ما أحب المظهر المرسوم أحب الشكل الطبيعي
يعني عادي لو انمسحت البودره شويه من منطقه ما دام أن البلشر معطي تأثير حلو
وفي النهايه كل شي راح يمتزج


لكن لو كنتي تميلين للمظهر المتحفظ هذا البلشر ما راح يعجبج
يعني ،،، لو ما تحبين مظهر الدميه (أو العروسه) ما راح تحبينه
بالنسبة لي ، أحب هاللوك 
يعطي شكل الدمى الروسيه ، هذي هي الدميه الروسيه





عاد هم كاتبين عليه أنه ممكن يستعمل للشفايف بعد ، لكن مادري ليش انا مو مقتنعه بالاستعمالات المتعددة
أحب أخلي الشي لاستعماله الأصلي فقط


سعره : 14 دينار (140 ريـــــال/درهم)

صايره مؤخرا أحب الأشياء الحلوه ، يعني اللي غلافها حلو وألوانها حلوه
هالشي قاعد يأثر فينيي ، بس هالمره بلاشر بنيفت طلع شكله حلو واستعماله حلو بعد ...

على العموم بنيفت قاعدين يركزون على الأشياء اللي تجذب كشكل ، بس الصراحه معظم الأشياء اللي استعملتها من عندهم كانت زينه ،
وأسعارهم مو غاليه مثل باقي الماركات
شي بديهي طبعاً ، لأنهم مو من زمان في السوق
والشركات الثانيه بحكم عمرها الطويل وسمعتها
تقدر ترفع الأسعار في العلالي مثل ما تبي

Review  Done
مع تدوينه جمالية أخرى لنا لقاء بإذن الله