Kiehl's Haul جديدي من شركة { كـــيــــــــلـــز }

Hi 

اليوم التدوينه أحسها مَرِحـــــــــــه
مع أنه مافي عندي أي ريفيو أقدمه
بس ، يمكن لأني أحب المستحضرات اللي من هالبراند علشان جذي متشوقه
أصلا محلهم حلو مادري شلون ....
خصوصاً الهيكل العظمي اللي ملبسينه بالطو دكتور 

تذكرون لما قلت إني ابي أجرب غسول جديد ...
هذا هو ، من مستحضرات كيلز ، شركة أمريكية
تخيلو موجودة من أي سنه ؟؟ 

 1851 ميلادي
يعني عمرها 163 سنه !!
ابتدت في مدينة نيويورك ، كصيدلية / متجرمحلي
مختص في بيع مستحضرات الوجه والجسم والشعر المصنوعة يدوياً
واللي تميزت بتغليف بسيط جداً وعملي
مؤسسها أسمه "جون كيلز"




في سنة 1920 اشترى مهاجر روسي "صيدلاني" المتجر
عاد يقولون أنه كان من السلالة الملكية ، وهاجر بعد قيام الثورة البلشفيه في روسيا ...
وقام يطور في المستحضرات ، ومن بعدها توالى أبنائه من الأجيال التابعه في إدارة المحل
لحد ما صار له زبائن كثار ، وفتحو لهم فروع في معظم الولايات
ومن بعدها ، خارج أمريكا ...


سنة 2000 م ، اشترت شركة لوريـــــــــآل العلامة التجارية لـــ"كيلز"
وقامت بتسوّيق بضاعتهم في المحلات الشهيره Department Stores
مثل هارفي نيكلز / ساكس / سلفريجز
ومن بعدها افتتحو محلات مستقله لهم
في شائعات ، أو حقيقة ، تقول أنهم (أحفاد الصيدلاني الروسي) ما قدرو يستوعبون الكم الهائل من الطلب المتسارع على منتجاتهم
وأنهم كانو في حاجة ضرورية لمساعدة شركة عندها خبره وإمكانيات أكبر
وفعلاً ، من عام 2000 م حتى اليوم
صارت كيلز معروفه في جميع أنحاء العالم ...

وأول مكان وصلت له في الخليج .. وين تتوقعون ؟؟
سؤال صعب 

 أكيــــــــــــــــد في دبي ، دار الحي
اللي مونستنا ومو مخليه خاطرنا في شي

على الأكيد إني شريت أغراضي هذول من دبي 

من قبل كنت مستعمله من عندهم المنتجات الخاصه بجميع أنواع البشره (اللي علبتهم بيضاء)
والسيروم العجيب .. Midnight Recovery Concentrate
وايد ارتاح له ، ما اهتم للي يقولون لي دهني وماعرف شنو
صح هو زيتي شويه ، لكن متى ما حطيته تمتصه البشره على طول ...
يعني مو مزعج ~ ترى ما أحب المستحضرات اللي تلزّق
لما شفت هالمره عندهم خط البشره الدهنيه (كل المنتجات لونها أزرق)
قلت خل أجربهم ..

{Let the Fun Begin}

صورة البوكس اللي حطو لي فيه الأغراض

اللي شريته ، كالتالي :

Ultra Facial Oil-Free Gel Cream
جيل مرطب للبشره الدهنية إلى العاديه
الحجم : 50 مل - في منه 100 مل
السعر : 110 درهم

 

Ultra Facial Oil-Free Cleanser
غسول الوجه للبشره الدهنيه إلى العاديه
الحجم: 150 مل
السعر : 90 درهم




وعطوني معاهم سامبل (Samples) تونر وسيروم

،، شريتهم قبل تقريباً شهر ،،

بس انتظرت لين يخلصون غسولي و كريمي اللي استخدمهم حالياً
لأنه مو حلوه اللخبطه
علشان أعرف بالضبط شنو اللي نفع لي ، وشنو اللي مو زين
ويمكن في شي يسبب لي حساسية أو تهيج ..
فأقدر أوقفه ، لكن في الخلطبيطه ما بعرف أي واحد فيهم السبب

إلا إذا بشرتج من النوع اللي يتغير
يعني فتره تصير جافه ، بعدين ترجع تصير دهنيه
هني تقدرين تغيرين ...

طبعاً ماعندي أدنى فكرة عن الأشياء اللي شريتهم ،
إن شاء الله يناسبوني ويطلعون حلوين
أول ما أجربهم ، بقول لكم رايي فيهم ...

بـــــــــــــــــــــــــــــــــــــــــــــآي