Essie Apricot Cuticle Oil - Review زيت المشمش للكيوتيكل من ايسي – ريفيو

Hi ~


اليوم عندي لكم ريفيو عن زيت الكيوتيكل بالمشمش من ايسي Essie
انا دايما استعمل زيت الكيوتيكل من أو.بي.آي O.P.I
و سويت عليه ريفيو  ،، بتلاقون موضوع سابق موجود

لكن ارتوس لما حطت انها تستعمل زيت ايسي ، للأمانه ما كنت أعرف عنه
قلت خل أجربه .. وجربته وعجبني وايد 

 واليوم راح اقدم لكم ريفيو سريع عنه من وجهة نظري الشخصيه والخاصه



هو عباره عن زيت بالمشمش ، ينحط للكيوتيكل .. يعني الجلد المحيط بالأظافر
علشان يلينه ويخفف من النشفان
يتميز بأن لونه حلو يفتح النفس ، مشمشي على برتقالي
واللي يرمز إلى أحد المكونات الرئيسيه فيه وهو زيت المشمش

قاعده الاحظ وايد منتجات العنايه بالأظافر هابين على زيت المشمش

الظاهر انهم اكتشفو انه جيد للعناية بالأظافر



طريقته مثل المناكير ، ينحط بالفرشاه ، لكن دار ما دار الأظفر
والمنطقة اللي تحت الظفر بشويه ، لكن مو توصلونه للاصابع بكبرها
ممكن بعد ينحط من الخلف ، لأن دايما المنطقه هذه تكون منسيه وجافه
وسبب من اسباب تكسر الأظافر هو جفاف المنطقة الخلفيه هذه..


الحلو فيه ان ريحته خفيفه ، وسهل الاستعمال ..
خصوصاً في المقارنة بزيت الكيوتيكل من O.P. I
وكثافته أخف بوايد .. ويعطي ترطيب سريع المفعول
ما يخلص بسرعه ، رغم اني احب احطه كل يوم قبل النوم
مو شرط استعمال يومي ، في ناس يحطونه مره في الاسبوع ، أو حتى مره في الشهر
أو كل مره تعدلون فيها أظافركم ، وانا ما عندي مشكله استخدمه يوميا ..


ورغم انه بعد ما يندهن على الظفر يتم في أثر "شكلي" بس
يعني يتم فيه نفس اللمعان على الجلد ، لكنه بالفعل غير دهني بتاتا
يعني الشكل الظاهر كأنه ماي ما تم امتصاصه ، ولكنه في الواقع تم امتصاصه
يترك مفعول شبيه بالندواه أو الماء ..احب نتيجته على الظفر


وهذا الشرح المكتوب على علبته ، علشان يكون عندكم فكره أوضح عنه







السعر : 42 درهم / ريـال ..
طبعا شاريته من دبي لأن ايسي نادرة الوجود في البحرين ،
يبيعونها في بعض الصالونات ، لا وبالطلبيه بس !!
والطلبيه تاخذ اسبوعين و حاله صعبه جداً

عيبه الوحيد انه يحتوي على بارابين Parabens ، وبالتحديد نوعين منها
وطبعاً يكاد يكون كل منتج تجميلي نستعمله يحتوي عليها
المكونين اللي تحتهم خط ، قاعده أحاول اتجنبهم في المستحضرات اللي استعملها









لكن بما اني في مرحلة التخلص من البارابينز والبحث عن منتجات بديله خاليه منه
صارت هذي الشغله على قائمة أولوياتي حالياً ، مهمه صعبه جدا جدا

ولو كنت مستمره عادي نفس قبل ومو قاعده احاول ابتعد عن البرابين ،
ما كنت عبت عليه اي شي بصراحه
شكرا ارتوس لأنج دليتيني عليه ..



ومع تدوينه جماليه أخرى لنا لقاء