Clinique Moisture Surge + All About Eyes

مساء الخير عليكم

اليوم عندي ريفيو عن مجموعة الوجه اللي قاعده استعملها حاليا من بداية الصيف من كلينيك
اقدر اسميها : السهل الممتنع
لأنها في وجهة نظري ابسط مجموعة ترطيب من كلينيك وأكثرها فاعلية في نفس الوقت
و سعرها مناسب .. بالرغم ان محد يلتفت لها ، وانا ما عجبني من كلينيك غيرها
هي مو مجموعة يديده ، ومو شرط اكتب عن شي يديد توه نازل في السوق مجاراةً للموجه السائده


كل الناس طايحين في مجموعة الخطوات الثلاث 3 Step Skin Care








جربتها مرتين ، ما عجبتني كرفاهية استخدام ولا ناسبت بشرتي من الأساس
جربتها مره وانا في الثانوي كلش ما سوت معاي اي نتيجة ، مع ان بشرتي وقتها ما كانت فيها مشكلات المراهقين
بالعكس يمكن الحين قامت تطلع لي حبوب وقت الدورة اكثر
ومره ثانية جربتها السنة الماضية ، ما تغير شي للأسف
كأني احط كريم في الهوا .. احب لما استعمل شي يحسسني بالرفاهية أو على الأقل الانتعاش
مع خالص احترامي للي يحبون هالمجموعة ويستعملونها ، اختلاف البشرة سبب وارد



المجموعة الوحيده اللي عجبتني من كلينيك واللي عليها ريفيو اليوم
مكونة من كريم للوجه وسيروم للعين وكريم للعين

اعتبرها مجموعة الحلاوه أو الجيلي
لأن استعمالها مرح وممتع بسبب برودتها على البشره ولونها البرتقالي العجيب

 

 

 

1-كريم الوجه : Moisture Surge ExtendedThirst Relief

خاص بترطيب البشره وإمدادها بالماء .. ترجمة اسمه تعني : جرعة الماء لري العطش
تركيبته خفيفه ذات قوام مائي ومناسبه للصيف ، تعطي ترطيب متوسط
واكثر ميزه عجبتني فيه انه يبرد واااايد
ثاني أو ثالث مره اشتريه ، وجريب أخلص العلبه هذي







بعد الاستعمال البشره تكون مرتاحه مافيها اي شد ، بالإضافة إلى الاحساس بالانتعاش
الترطيب جيد ، ولكن ما يعالج مشكلة البشره شديدة الجفاف
السعر : ما اذكره بالضبط ، حول 25 دينار (250 ريــال / درهم ) و في منه كذا حجم



2- سيروم العين : All About Eyes Serum De-Puffing Eye Massage
مصل ينحط في المنطقة المحيطة بالعين من تحت ومن فوق ، وانا امرره على الحواجب بعد
ينحط عن طريق كره دواره معدنيه ، يبرد على العين واحبه وايد
خصوصا لو راجعه من مشوار في الشمس
وينشف بسرعه مع انه لزج مثل الماي اول ما ينحط







حسب وصف الشركة ، يستعمل لعمل مساج للعين
لكن انا مجرد ما احطه اكتفي ما احب اقعد اسوي مساج بالمنتج نفسه ،
هو بسرعة يعطيني مفعول مهدئ
مافيه اي خواص مقاومة للتجاعيد ، لكن بعض الأحيان الخطوط الرفيعه تكون بسبب الجفاف
فالمفعول اللي يعطيه قدرت اشوف نتايجه بحيث ان المنطقة تكون فيها لمسة نضاره وارتياح ، حتى في تقاسيم العين ..

بما انه مصل ، يطبق ومن بعده تحطين فوقه كريمج المعتاد ..
لكن احياناً ما احط وراه شي يغنيني عن كريم العين
السعر : 25 دينار (250 درهم / ريـال)





3- كريم العين : All About Eyes / Rich
لاحظو كلمة Rich تعني التركيبة الكريمية الغنية ، في منه جل ايضاً
استخدمه بعد السيروم وساعات استعمله بروحه بدون سيروم تحته ..







هالكريم اقتصادي وفعّال ، خصوصاً للمبتدئين في مجال العناية بالبشرة
لكن ما يبون يستعملون المنتجات اللي تباع في السوبر ماركت والصيدلية ،
يعني ماركة ولكن سعرها رخيص مقارنة بباقي كريمات العين
أو بالمصطلح السائد في عالم التدوين :
منتجات الدرق ستور Drug Store Products = المنتجات الرخيصة اللي تباع في الصيدليات والسوبر ماركت ،
كلمة " درق ستور " معناه صيدلية أو بالتحديد "دكان الأدوية"
الماركات هذه تشمل أولاي ، نيتروجينا ، جونسون ، نيفيا ، جارنييه واخواتهم من شركات العناية بالبشره
وتضم ايضاً ميبيلين ، لوريـال ، بورجوا ، نيكس ، ريميل وشبيهاتها من ماركات الماكياج
اما الماركات اللي تباع في المحلات الكبيره مثل سيفورا ، دبنهامز ، وجوه ، ساكس ، هارفي نيكلز
هذه يسمونها : هاي إند "High End" أو ديبارتمنت ستور"Department Store" برودكتس



[شرح بسيط بس علشان اوضح ]

ان اللي ودها تستعمل شي مستواه شوي اعلى من الماركات العادية مثل جونسون واولاي
ولكن
ما تبي شي غالي وايد مثل ديور وشانيل
تقدر تستعمل هالكريم من كلينيك هو في الوسط بين الاثنين


ملمسه كريمي غني ، لاحظت عيني منوره مع الاستعمال المستمر
خصوصاً قبل المكياج يمنع تكون الخطوط وتجمع المستحضرات تحت العين
ويفيد في حالات الانتفاخ ، لكني ما عانيت منها وايد ..
لما تييني هالحاله هني فعلا الاحظ تأثيره


السعر : 22 دينار (220 ريـال / درهم)
الحجم الصغير 15 مل سعره 17 على ما اعتقد
لكن انا شريت هالحجم مره من المطار مو متأكده لو موجود في المحلات العادية
لأن بعض النوعيات خصوصاً الأحجام الصغيره تكون خاصة للبيع في المطارات


[في اختلاف اسعار بين الدول / احتمال وجود فرق بسيط أو كبير في السعر]





وبجذي اكون طرحت عليكم المنتجات الوحيده للعناية بالوجه اللي عجبتني من كلينيك ..
بغض النظر عن المكياج لأن مالي تجارب كثيره معاهم
ما عدا الماسكارا وكانت وايد مرررره ممتازه ...
وقلوس مرطب بعد كان حلو
اما عطر هابي "Happy" من كلينيك .. هذا اللي ذكريات المدرسه كلها فيه

ومع تدوينة جمالية أخرى لنا لقاء