The Face Shop – Review of face mask sheets ذا فيس شوب – ريفيو لأقنعة الوجه الجاهزة

 



مرحبا ..

تدوينة اليوم يا غاليين راح تكون عن ماسكات أو "أقنعة الوجه"
من محل اسمه ذا فيس شوب {The Face Shop}
المحل هذا أصله من كوريا ...

 

 

 

 

 

طبعاً البنات هالأيام خصوصاً المراهقات هابين في المسلسلات الكوريه
وصار كل شي كوري له شنّه ورنّه  عكس الأول
وهذا بطلكم الممثل الكوري ، الوجه الإعلاني للمحل






كالمعتاد ، أول مكان فتح المحل في الخليج هو في دبي ، دار الحي
انا عن نفسي ما جربت من عندهم إلا أقنعة الوجه الجاهزه ،
اسمها Face Mask Sheet اللي بتكلم عنها اليوم
في عندهم منتجات كامله للعناية بالبشره والجسم من غسول وكريمات ومقشرات وماكياج بعد !!
ولكني ما قط جربتهم .. وما اقدر أحكم علىيهم



أكثر شي لفت نظري لما دخلنا المحل أول مره ، قبل سنتين تقريباً في دبي
مصففين اقنعة الوجه هذي على مساحه كبيره 

و عجبتني فكرتهم .. القناع جاهز عبارة عن قطعه كاملة على شكل الوجه
وفيه فتحات للعين والخشم والفم , ما عليكم إلا ان تحطونها
و تصيرون نفس كاسبر








طريقة استخدام القناع :
تفتحون الباكيت ، وتفردون القناع
تحطونه على ويهكم ولازم تضبطونه ، وضغطو على المكان اللي تحسونه نازل
بحيث يتناسق مع تقاسيم وجهكم
تخلونه لمدة 15 -20 دقيقة ، وبعدين تشيلون الماسك
انا احب احطه 20 دقيقة ، لما اتأكد أن القناع ابتدأ يطيح
جذي تكون الماده اللي فيه نشفت وامتصتها بشرتي
أحس ان قبل العشرين دقيقة ما يكون نشف تماماً
لكن لو حسيتو انه مضايقكم أو حسيتو بوخز شيلوه بعد 15 دقيقة
و ما فيه حاجه أنه ينغسل ، لو ظلت بقايا راح تستفيد منها البشره وتمتصها
وفي أسوأ الأحوال لو كان فيه ماده لزجة وايد وزاعجتكم ،
مسحوها مسح خفيف جدا بالطبطبة بقطنة
طريقة الاستعمال هذه تنطبق على كل أنواع الماسكات









تجربتي مع الأقنعة :
يتواجد عندهم أنواع مختلفه ، مصنفينهم حسب نوع البشره و مكونات القناع
منها للترطيب ، النضاره ، التفتيح ، امتصاص الدهون وغيرها
ومنها بالفاكهة ، الشاي الأخضر، الكولاجين وخلافه

السعر ~
يتراوح سعر القناع الواحد بين 15 إلى 35 ريـال/درهم
داخل كل باكيت / مغلف ، في قناع واحد فقط
يستعمل مره واحده وترمينه



من ضمن بعض الأنواع اللي جربتهم :

قناع حمض الهياليورونيك Hyaluronic Acid Mask Sheet :
احس ويهي ينترس ماي لما أستعمله ، زين حق الترطيب



قناع اللؤلؤ Pearl Mask Sheet :

 

الغرض منه إضافة الإشراق للوجه ، طبعا لا تنتظرون المعجزات من قناع يستعمل لمره واحده ...
لكنه يعتبر جيد كمفعول مؤقت قبل حفله أو مناسبة . لاحظت ويهي مرتاح شوي معاه


قناع الكولاجين Collagen Mask Sheet :
للترطيب وتماسك البشره ، زين وايد ..
لكن ما ابي اقعد اقول لكم حلولدرجة تخلي بعض الأخوات يبنون آمال
بأنه راح يعدل بشرتهم ويغيرها ،أكيد ما في شي بيتغير جذرياً
وخصوصاً من استعمال واحد ..
و لكن الحلو في اقنعتهم اني اشوف نتيجة فورية
على الأقل أفضل من كثير منتجات مشابهه موجودة في السوق ،
وبالأخص مقارنةَ بأسعارهم تعتبر رخيصه والنتيجة مرضية ..




قناع الرمان Fresh Fruit Pomegranate Mask Sheet:

 

 أيضاً للنضارة والترطيب ، يونس ومفعوله مشابه لباقي الأقنعه 

 في كذا نوع من الأقنعة بالفاكهة بس ما اتذكر ليش اخترت الرمان
يمكن الباقيين للشد ، مو متذكره بصراحه


قناع 3D مع أمبولة حمض الهياليورونيك والكولوستروم
3D Ampoule Mask Sheet Hyaluronic Acid & Colostrum :
مختلف شوي عن القبليين ، المادة موجودة بروحها توزعينها على البشرة الأول
بعدين تفتحين القناع الأبيض وتحطينه على ويهج
المفروض يعني ان مفعوله يكون شوي أقوى ،
لكن ما لمست الفرق عن قناع الهياليورونيك العادي ، نفس الشي ..
الفرق الوحيد إنه زادني حوسه 

 وانا اساساً مختارتهم علشان سهلين
وقت ما أكون كسلانة ما أنسى أحط قناع ، بس افتح وألصق
وعلى فكرة الكولوستروم هو الحليب الخفيف اللي تنتجه الثدييات بعد الولادة مباشرة !!
ما أعرف مدى مصداقية وجوده ، أو شنو بالضبط الكمية اللي استعملوها ، وشلون عالجوها واظافوها للقناع






العيوب "من وجهة نظري الشخصية" :

+ الأقنعة مقاسها كبير ، القصة ما تتناسب تماما مع حجم ويهي ،
أكبر منه بوايد يعني ويهي زين متوسط مو صغير ولا كبير
بس ينزل ويتدلى من الجوانب ومن تحت ،
حتى أصير أضغط عليه كل شوي بيدي علشان ما يطيح



+ كمية السائل الموجوده داخل القناع ممكن تكون أزيد من الاحتياج ..
مادري هل يعتبر عيب ولا ميزه ؟؟
أحس أنه كمية الماده مبالغ فيها ، لو يخففون منه يكون أفضل ..
يمكن صايرين كريمين ما يبونه ينشف
أو يمكن في ناس تحب هالشي ..
ممكن تاخذون الزياده اللي داخل المغلف وتمسحونها على الوجه بقطنه قبل لا تحطون القناع





غير عن أقنعة الوجه ، استعملت منتجين ، كالآتي :


قناع للشفايف BeBe Lip Mask :
يعطي ترطيب ونعومة للشفايف ، وحسب الوصف اللي عليه يزيل التشققات والجفاف
بس ما وصلت شفتي لمرحلة التشققات هذه ، ما ادري هل بيفيد الشفه المتشققه ولا لأ
لكنه حلو وايد بعد ما استعمله تصير شفتي تزلق وة
والخطوط تخف
مدة الأنتظار : 10 إلى 20 دقيقة
لكن لا تنسون أن كل المفعول مؤقت ، يعني مش معالج دائم ..
أكثر شي يعجبني فيه ، شكله الخارجي ...





مرسوم عليه صورة بنت كيوووت ، رابطه راسها بوشاح وردي
لكن فيه شي موعاجبني .. حجم القناع بعد أكبر بوايد من رسمة الشفايف
مادري شسالفة الأحجام عندهم ، مو مضبطينها
مو عارفة شلون أتعامل معاه ، يطلع خارج محيط الشفه على برا
صرت أحطه على المنطقة حول الفم علشان ما استفيد منه قد ما أقدر
جزء كبير منه يروح بدون فايده
لكني مستمره في شراءه واستعماله
لما يكون منتج فيه عيوب ، مو معناته أنه سيئ


قناع للعين بجذور التوت البري Raspberry Roots :
قناع بطل للعين ، بناء على تجربتي ... يخفف من النفخه ويعطي جرعة ترطيب قوية
أهم شي أنكم ما تغسلونه عقب ما تحطونه .. لضمان أكبر فائده
انا احطه قبل النوم ، واصحى الصبح يكون فيه فرق واضح تحت العين
الحبة الواحدة فيها مغلفين ، يكفي للاستخدام مرتين يعني
داخل كل مغلف قطعتين ، لكل عين قعطعة
مدة الانتظار : 30 – 40 دقيقة

الشي السيء فيه ، ممكن يعطي شعور مزعج شويه وانتي حاطته ، لأن الشريحه كأنها بلاستيك شوي
والحل أنكم تثبتونه بالطريقة الصحيحه
لا تلصقونه وايد جريب من العين عطو شوي مسافه علشان تكونون مرتاحين وانتو حاطينه







أول مره استخدمت هالاثنين ، اللي اهما قناع الشفايف والعين 

 خسرت المنتج كله على ولا شي
لأني ما طبقته بالطريقة الصحيحه ...
رغم إني اتبع الإرشادات بحذافريها لكن صارت لخبطة شوي
احتست وانا افتح فيهم ونزل كل السائل على يدي
انسدت نفسي وفي النهاية حطيتهم وانا متغصبه (أو مقهوره)
بس بعد ما شفت النتيجة شريتهم مره ثانية وحطيتهم عدل ..
الحمد لله نجحت المحاولة الثانية


انتو شيلو الأوراق من الجانبين وبعدين قطعة البلاستيك اللي في الوسط هي اللي تستخدمونها