Skin Care Rotine روتين العناية بالبشرة

مرحبا

اليوم موضوعي بيكون عرض لروتيني الحالي للعناية بالبشره .. بغض النظر سواء المنتجات زينه أو لا
بيكون مثل الميني ريفيو للأشياء اللي استعملها في العناية ببشرتي في الفتره الحالية (ابتداء من شهر أغسطس)

المفروض ان خطوات العناية تكون مرتين في اليوم .. مره الصبح ومره قبل النوم في الليل
لكن بعض الأحيان ما أحب أبالغ بزياده علشان ما تتحسس البشره أو تنشف من كثر الغسل والتنظيف
ففي بعض الاوقات الصبح بس أمسح ويهي بحليب منظف بدون ما أغسلها وأحط كريم مرطب مباشرة
لكن في الليل قبل لا أنام لازم أسوي كل الخطوات اللي راح أذكرها اليوم
أرتاح أكثر لما أسوي التنظيف كامل في الليل علشان أتأكد أن البشره نظيفة و تتنفس

ويالله ننتقل لخطوات العناية اليوميه أو ال Skin Care Routine :

 

 

  

 

الخطوة الأولى : غسل الوجه
 

خلال شهر اغسطس استعملت غسول لطيف للوجه من كلينيك ، رغم أن وايد اشياء جربتها منهم وما ناسبتني
لكن الموظفه اللي كانت في كاونتر كلينيك كانت لطييييفه جدا جدا ، واستحيت أكسر بخاطرها
وكان ما عندي فيس واش ، فقلت لها عطيني شي خفيف (مجربه من قبل الغسول اللي في مجموعة الثلاث خطوات وحسس لي بشرتي)
فعطتني هالنوع ، اسمه مايلد ليكويد فيشال سوب Mild Liquid Facial Soap
ما فيه اي مميزات ، غسول عادي ينظف من آثار المكياج ، ما حسس لي ويهي
ما فيه أي شي زود يذكر .. استعملته كله وجريب بيخلص







الخطوة الثانية : الحليب المنظف

بالقطنة وأمسح على كامل الوجه والرقبه والعين بعد ...  علشان أتأكد أن كل الأوساخ والدهون أزيلت تماما
حاليا النوع اللي استعمله من شانيل ، جذبني فقلت بجربه
عباره عن ميلك أو "حليب " من ضمن المجموعة المختصه بمقاومة التلوث وتنقية البشره من السموم والملوثات اللي تمتصها
سواء من عوادم السيارات ، الغبار والأتربة وغيره
لما ما أكون حاطه مكياج أو قاعده في البيت طول اليوم ، أطوف هالخطوه وانتقل للي بعدها مباشرة
الحليب طلع عادي وأقل من العادي .. ما لاحظت اي نقاوه زايده على أساس انه بينقي البشره ويمتص آثار الملوثات
على سعره ما يسوى .. في أحسن منه وأرخص من اللي استخدمتهم قبل
ريحته جميله جدا ، لكن ممكن بعض الناس يتحسسون من العطر الموجود فيه
انا ما سوى لي شي ، لكن ما برجع اشتري هذه النوعيه لأن ما استفدت شي يذكر

 

 

الخطوة الثالثة : الانتعاش والنداوه

استعمل ماء مرطب أو ماء ورد علشان مجرد أعطي انتعاش ودلع للبشره ، وبنفس الوقت أحضرها لامتصاص الكريم

ماي الورد يعطي إشراق ويقبض المسامات ، أما الماي العادي أحس بانتعاش ونداوه لما احطه .. حتى لو ما كان له تأثير مباشر
النوعين المتواجدين عندي حاليا هم ماء ايفيان البخاخ للأطفال (ما فيه فرق عن ماء ايفيان العادي)
والنوع الثاني ماء ورد ايراني لقيته بالصدفه في صيدلية وكان نوع للبشره الحساسه وواحد ثاني للبشره الدهنيه
 لكن هذاك كان كأنه مفتوح وأحد لاعب فيه ، قمت خذيت اللي للبشره الحساسه ..
 في نفس الوقت قلت اجرب علشان ما يهيج بشرتي ... اثنينهم حلوين واحب يكونون عندي بشكل دائم
تنبيه : ماء الورد فيه ريحة ماي الورد العادي ، اللي ما تحب هالريحه ما بيعجبها









 

 

 

الخطوة الرابعة : التونر لقبض المسامات وإزالة باقي الشوائب
 

حاليا استعمل تونر من لاش ، اسمه Breath of Fresh Air يعني نفس من الهواء النقي :) شرايكم في الترجمة
بشكل عام تونرات لاش ممتازه جدا وتضاهي الأنواع الغاليه ، وأكاد أجزم لو ما كان فيها مركب PropylParaben كنت صنفته من افضل التونرات اللي مرت علي
استخدامه حلو ايضا لأنه عن طريق بخاخ سهل جدا ، ممكن رشه مباشرة على الوجه بدون قطن
واللي تحب تستعمل القطن ترش على القطنة وتمسح فيها ..
ريحته منعشه ويعطي الاحساس بأن الهواء قاعد يدخل للبشره فعلا
هو حلو والتي تري بعد حلو من لاش ، لكن هذاك بس للبشره الدهنيه ، هذي لكل أنواع البشره
 

 


 

الخطوة الخامسة : الكريم المرطب للوجه

هالكريم أحبه ، استعملته من قبل من مجموعة الترا فيشال من كيلز
أحس ان المجموعة هذه من أفضل المنتجات اللي عند كيلز ، لأني جربت الخط الخاص بالبشره الدهنيه وما عجبني
كتبت من قبل تجربتي معاهم  ، الموضوع المباشر هــــنــــا
الكريم يستعمل لجميع أنواع البشره ، واللي يميزه أنه كريمي جدا لكن في نفس الوقت يمتص وما يدهن
 

 


يعطي البشره الترطيب القوي اللي تحتاجه ، بدون ما يسوي حساسية أو حبوب
يعني مجرد يومي بعد ما استعمله ترجع بشرتي ترتوي وتهدأ من الترطيب اللي الكريم يعطيه
السهل الممتنع هو هذا الكريم
قوامه متماسك ومتوسط ، لا هو لزج وايد ولا هو جامد بزود ما نقدر نمده على البشرة






 

الخطوة السادسة: كريم العين المرطب

 للحين ما خلص من عندي كريم كلينيك أول أباوت آيز (All About Eyes)
مسويه عنه ريفيو كامل ، لو حابين تطلعون عليه الرابط من هـــنـــا






روتيني للعنايه يختلف مع مرور الوقت ، وان شاء الله كلما استعملت شي يديد راح أكتب تجربتي عنه
وأنقل لكم تجربتي مع الأشياء اللي استعملتها بالحرف الواحد مثل ما صار معاي
كل الأشياء شاريتها من فلوسي الخاصه .. ما أسوي دعايات ولا أمدح أو أذم شي لهدف معين
وطبعا ردود فعل البشره تختلف من شخص للثاني
وأنا أتمنى أنكم تستفيدون ولو بشي بسيط ..

باااااي