Midnight Recovery Concentrate by Kiehl's إكسير المعالجة الليلية المكثفة من كيلز

مرحبا ...

 

 

اليوم راح أكمل سلسلة الريفيوز لمجموعة السيرومات اللي استعملتهم أو ما زلت أستعملهم

مثل ما وعدتكم من قبل ، علشان أكون طرحت أكبر عدد ممكن ويكون كمرجع لكم في حال حبيتو تشترون أي نوع

 

اليوم إن شاء الله الريفيو إيجابي لأقصى درجة !!

 

سيروم (أو بالأحرى مركز أو إكسير) العناية الليلية الفائقة من شركة " كيلز" Kiehl's

 

Midnight Recovery Concentrate

 

 

 

 



 

 

الشركة هذه أمريكية ، كتبت عنها  بالتفصيل في موضوع سابق هـــنــــا

وشلون أنه كانت لي معاهم تجربة مو حلوه في المجموعة الخاصة للبشره الدهنية

لو حابين ترجعون للموضوع  عن المنتجات اللي ما حبيتها الرابط من هــــنـــــا

 

لكن مثل ما ذكرت وجود مستحضرات ما عجبتني ، ما تخليني أغير رأيي في الشي اللي أحبه

وهالسيروم بالذات من أفضل أنواع السيروم اللي استعملتها رغم أنه تقريبا ارخص واحد منهم !!

إن شاء الله عاد ما يقعدون يلعبون بالأسعار كالمعتاد لما يجوفون الناس حابينه ..

 

وننتقل الحين للتفاصيل عنه

 

ما هو المنتج : عباره عن سيروم أو مركز ، خاص بالاستخدام في الليل قبل النوم فقط بسبب قوامه الزيتي

مكون من مستخلصات نباتيه وزيوت طبيعية

 يعد بأن يرجع التوازن الطبيعي للبشره خلال النوم ، ويعزز عملية تجديد الخلايا عن طريق إمدادها بالدهون

طبعا مب دهون اللي تطلع الحبوب ، لا بالعكس حتى البشره الدهنية تحتاج دهون علشان تحافظ على بضاضة ونضارة الليبيدات
لكن ، ما أقدر اصنفه كسيروم عادي نفس الباقيين لأنه مختلف عنهم .. قوامه مو نفس السيروم
يعني لما نستعمل السيروم يكون لزج وبعد شوي ينشف يصير نفس الكريم .. لكن هذي لا
نفس الزيت قوامه وملمسه .. وتطغى عليه ريحة اللافندر
لما أحطه ، ينومني على طول !! مادري شنو قصة الزيوت هذه لأني استعملت بعد زيت اللوتس من كلارنس ويعطيني نفس الشعور
أحس إني قدرت أرصد تأثير الزيوت العطرية على الراحه والاسترخاء ..

 

راح أذكر لكم بدون إطاله بعض من المكونات المكتوبه على العلبة اللي لفتت انتباهي :

 

Evening primerose oil , jojoba seed oil , lavender oil , rosemary leaf oil , tumeric root extract

 

يعني صرت أبو العريف وحدسي يقول لي إن هذه هي المكونات اللي تخليه فعال هههههه

 

طريقة الاستخدام : حسب التعليمات المذكوره ، نحط قطرتين إلى ثلاث قطرات (هو ينحط عن طريق قطاره مثل معظم السيرومز)

على بشره مغسوله ونظيفه ، ونسوي مساج بسيط حتى يتوزع على الوجه كامل وتمتصه البشرة

انا احط أكثر شويه بس ، يمكن حول 5 قطرات وامسج فيها الويه والرقبة

 

 

 

ما حسيت بالإنزعاج من قوامه ، أول ما ألمسه هو زيتي لكن بعد ما ينحط تتشربه البشره

ما يمتص تماما تماما مثل الكريم ، شي أكيد لأنه مكون من زيوت

لكن في ظرف ربع ساعه قبل لا أنام أكون نسيت إني حطيته .. غير عن ريحته المريحه وما لها علاقة بالزيوت العادية

 

تصميمه عملي سهل المسك والحفظ (عندي حجم 30 مل) وسهل للسفر بعد

علبته زجاجية لونها أزرق معتم ، لكنه زجاج متين مو سهل الكسر 

 أما مسكة القطاره فهي بلاستيكية وهالشي أسهل للتنظيف لأن الزيت راح يترك آثار مع كل استخدام

 

النتائج : نتائج مرضية لأقصى درجة .. أبسط وصف أقدر أقوله أنه " يروق" الوجه

أي أثر لحبوب يختفي معاه بسهوله ، لكن بالاستمرار والانتظام اليومي عليه .. يعطي ترطيب شديد يا زول .. ويحسن لون البشره

وأقصد بهالشي ، انه يعطي شوية من البهاء أو الإشراقة للون البشره ويزيد من تماسكها

 

لكن أرجع واقول أن لو كان اللون الباهت للبشره بسبب ضعف التغذيه ، او فقر دم ونقص في الهيموقلوبين ، في هالحالة ولا أفضل كريم في العالم يقدر يصلح البشرة :)

 

السعر : تقريبا 25 دينار على ما أذكر

 

 

محلات كيلز موجوده في الإمارات العربية المتحده فقط في دبي ، عندهم محلين في دبي مول واحد داخل بلومينغديلز والثاني في الطابق الأول

  وموجود أيضا في هارفي نيكلز مول الإمارات .. وفي مطار دبي 

 

وبما أن احنا في العطلة الصيفية ، المحل موجود في معظم دول أوروبا (بريطانيا ، فرنسا ، المانيا ، ايطاليا ، الخ )

وموجود في تركيا وماليزيا وتايلاند .. والدولة الأم للشركة طبعا هي أمريكا  

 

لو عندكم أي استفسارات عن السيروم ، لا تترددون أن تتركونها لي تعليق تحت التدوينه

 

باي