Marc Jacobs Makeup in Sephora Bahrain مكياج مارك جيكوبز - سيفورا البحرين

مرحبا ..
اليوم ما عندي ريفيو ، لكن خبر مكياج مارك جيكوبز المنتظر طويلاً نزل عندنا في سيفورا البحرين !
 ان شاء الله يكون على قدر المدح للمستحضرات اللي انمدحت
 وفي أشياء وايد ذموها الناس اللي استعملوها 
 خصوصاً اهل دبي لأنها وصلت عندهم من شهر 12 السنة الماضية








هذي الكاونتر ، اول ما تدخلون في سيفورا
والسموحه منكم الصور مب وايد واضحه ، كان وايد ناس وزحمه
وانا طايحه تصوير بالموبايل موهامني

 

 



 

شريت منهم أشياء وايد ، بيكون لها ان شاء الله ريفيو أول ما اجربها
المستحضرات الموجودة عندهم شامله ، يعني خط مستحضرات تجميل كامل
يشمل كريم الأساس ، الكونسيلر ، البوردة المضغوطة
احمر الشفاه ، قلوسات ، ماسكارات ، صبغ أظافر ... الخ

من أكثر الأشياء اللي عجبتني وأغرمت فيه على طول من أول "نظرة"
مناكير اسمه "Petra" ورقمه 140 ... اتوقع ان قصدهم هو البتراء في الأردن ما غيرها
لأن اللون صحراوي
برونزي محروق / على نحاسي ميتاليك وفيه ذرات غليتر خفيفة مو مبالغ فيها

 

 

 

 

 

هني صورته على يدي ، وحاطة بس طبقة واحده
[الصورة بدون فلتر - اللون كما هو بدون تعديل]
 

 

اللون قوي وواضح ، ولما أحط طبقتين يصير أحلى وأحلى
لكن طبقة واحده منه تكفي في حال كنتي مستعجلة
سهل المد ، ينشف بسرعة وما يتكتل
مع أن سمعت وايد ناس يقولون ان مناكيرهم مو حلوة تتقشر بسرعه
يمكن لأن اللون اللي اخترته قوي ولو خذت ألوان خفيفه وفاتحه بيكون مو واضح ؟؟ ما عندي فكرة للأمانة
وبالنسبة لأنه يتقشر بسرعة ، انا ما خليته لأكثر من 3 ساعات
شيله بعد سهل على عكس معظم المناكير اللي فيها غليتر
السعر : 10 دينار (100 ريــال / درهم)

وعلى فكرة نيو لوك أظافري اليديد هو قصار ، كان طولهم يتراوح بين متوسط الطول إلى طوال بس فوق اللحم بشوية
تمللت وايد من الأظافر الطويلة وقررت أقصهم
حاسه إني قرعة
لكن اكتشفت انهم عجبوني ..
ان شاء الله بعد ما يخلص الصيف برجع أطولهم علشان الألوان الشتوية ما تصلح إلى على أظافر طويلة
رغم إن الوضع الحالي "عــاجبني"
راحة ما فوقها راحه وأحس ان يدي صارت خفيفة :) شكلي قاعدة أبالغ

هذا كل ما لدي اليوم