Personal Hygiene Dislikes العناية الشخصية : منتجات مخيبة للأمل

مرحبا ...

اليوم في التدوينة اخترت كذا منتج مختص بالعناية الشخصية وما عجبوني بتاتاً

عادةً ما اميل وايد لذم منتجات بهالطريقة خوفاً من ان تكون مناسبة لأشخاص غيري وعاجبتهم أصلاً

فأكون سديت باب على أصحاب العلامة التجارية أو المنتج بغير قصد .. ومثل ما يقول المثل : بين البايع والشاري يفتح الله :)

لكن المنتجات اللي اخترت اوضح مساوئها قهرتني وايد وما قدرت امسك نفسي عنها ..

 

 

راح ابدأ بالعرض واذكر ليش ما عجبتني :

 

1-  كريم سيبا ميد لليد والأظافر     Seba Med Hand + Nail Balm

 

 

 

 

 

 

 

 

 

  نادراً ما اكره شي من عند سيبا ميد ، وكنت استخدمها من وانا في المدرسة ، كريمات الترطيب عندهم حلوة

بس كريم اليد ما عجبني ..

ريحته اول شي توحي بشي طبي ، كأنه مسحوق تنظيف او شي مشابه ، لكن اقدر اتحمل الريحه عادي

ملمسه اول ما احطه من الانبوب سائل جدا مب متماسك وبعدين يدهن ويسي طبقة لامعة وملتصقة باليد

ما يصلح للاستخدام خلال النهار لازم قبل النوم

النتائج جميلة جدا من ناتحية الترطيب لأنه يحتوي على البانثينول والكيراتين ويستخدم في الأصل كعلاج لليد المتحسسة وشديدة الجفاف

اقدر اقول انه يعتبر علاجي أكثر من كونه كريم مرطب للاستخدام العملي .. لكن بصراحه يدي كانت دوم طريه ونادرا ما اجوف فيها اي جفاف طول وقت استخدامي له ..

هالكريم مكوناته ممتازه ، كعادة معظم مستحضرات سيبا ميد ومصنوع في ألمانيا ...

في النهاية انا استخدمت العلبة كاملة وما قطيتها .. لكن فرحت فرحة شديده لما خلص :)

سعره : دينار وشي

2- غسول لليد من شركة نيستي دانتي بخلاصة العسل وجنين القمح    Nesti Dante honey wheat germ liquid soap

 

 

 

 

غسل اليدين سبب رئيسي من اسباب جفاف اليد وعدم نضارتها ، حتى التصبغات اللي تصير في اليد قد يكون سببها الجفاف واستخدام الصابون بكثرة  ، او الصابون نفسه يكون وايد قوي

طبعاً انا وسواسية اغسل يدي يمكن فوق 30 مره في اليوم .. لهالسبب دايما ادور على صابون يكون لطيف Mild وخالي من السالفات ، بحكم استخدامي المكثف والدائم

لقيت هالصابون السائل من شركة نيستي دانتي ، وهي مشهورة بصنع الصابون الإيطالي عالي الجودة

وقبل حطيت في الانستقرام صابون عليه رسومات اطفال صغار ، هذي هي الشركة

قلت أكيد انه زين دام اني مجربة منهم الصابون حلو بصراحه ، واشتريته

من اول ما استعملته لحد ما خلص ما حسيت فيه ، مادري شلون خلص اصلا

ما استقدت منه ولا شي حتى احيانا ما اثق فيه ، استخدم صابون عادي بعدين استعمله احسه ما ينظف

هو ملمسه مثل الجيل ، بس حسيته ما ينظف اليد عدل .. كأني احط شي في الهوا :)

الحسنات انه خالي من السالفات اللي يحسس البشره على المدى البعيد ويحتوي على زيت الزيتون ، العسل  وزيت جنين القمح

سعره : 3 دينار

 

3- فوط صحيه من شركة أورجانيك كورمان    Organic Corman Panty-liners

 

  العذر والسموحه منكم ، بس راح اذكر هذي الفوط الصحية ، للاسخدام اليومي

شدت اننتباهي لأن مكتوب عليها انها مصنوعة من قطن عضوي وخاليه من اي بلاستيك او نايلون وما تسبب الحساسية ،

والممتصات اللي المفروض تمتص الرطوبه خاليه من المواد البتروكيماويه ، وخاليه من العطور والكلورين

قلت لازم اجربها

 

 

هو صحيح ان ملمسها من فوق ناعم وقطني بس ما تثبت في مكانها اكرمكم الله تتحرك ، يعني تلبسينها في مكان تلاقينها في مكان ثاني :)

وبعد تنثني ما تظل سيده ، يعني عادي بعد ساعتين تلاقينها طالعه من الأطراف ، اكيد فاهمين قصدي بحيث انها تزعج وما تؤدي الغرض اللي المفروض يكون

غير انها تطلع صوت :)))  والله لو لابسه تنوره مب بنطلون ساعات اسمع صوت ههههههههههههه مثل صوت الكيس يتحرك

والقهر سعر العلبة فيها 24 حبه كانت بثلاثة دينار .. ما تسوى بصراحه  ،،

ما استفدت منها كنت اغير 3 مرات في اليوم لأنها كل شي تتحرك من مكانها ،، طبعا في الأيام العاديه ما تصلح ابدا لأيام الدورة الله يعزكم

يمكن لو اخذت اللي بأجنحه انحلت المشكله .. مادري

 

4-  فوط صحية ايزي داي Easy Day overnight pads with wings 

 

 

 

 

اول مره اجوف هالشركه ، قمت طخيته كالعادة .. مصنوعة في كندا

من النوع المضغوط ، واللي اخذته للاستخدام الليلي .. وبعد تسرب !!  غير ان الصمغ قوي ، حشى سوبر غلو

فوق انها تسرب وما يعتمد عليها ، في وسطها في نفس الشريط اللاصق لونه بني ، عجزت اعرف الهدف منه :)

المهم اني استعملتها كفوط يوميه

 

 

5- شاول جل من دايل بجوز الهند   Dial Coconut Water Hydrating Bodywash

 

 

 

 

مجربه من قبل شاور جلز من شركة دايل وهي شركة امريكيه ، ومعظهم عجبوني

بس هالنوعية ما ناسبتني ، الجل المفروض انه مرطب لكن ما عطاني اي ترطيب

وينزل من العلبه كتل ويخليني احس بالبروده ، بس اكثر شي ما حبيته هو مثل ما قلت ينزل على شكل كتل وما يتوزع على الليفه

ما كنت احب وقت الشاور بسبب هالشاور جل ، بس احب احلل كل شي وما احب اقط فاستعملته كغسول لليد في النهاية

 

 

 

ممكن البعض يعرف هالمنتجات وممكن لا ، بس حبيت اطلع حرتي ..

وفي احتمال الاشياء اللي ما احبها احد غيري يحبها ، مو شرط ، وبس سلامتكم

 

بـــــــــــــــــآي