Insight Shampoo & Hair mask review - ريفيو شامبو وقناع إنسايت للشعر الجاف

يا ميت اهلا وسهلا ..

 

التدوينة اليوم راح تكون ريفيو لشامبو وقناع من شركة " إنسايت " Insight  للشعر الجاف والمتضرر

 

هالمنتجات توها نازله جديد ، وحبيت اجربها .. 

تتميز بأنها خالية من المركبات التالية :  السالفات ، البارابينز ، العطور ، الألوان ، السيليكون و الزيوت المعدنية من مشتقات البتروليوم

 

 فوق كل هذا ، مصنوعة من مكونات عضوية أو "اورجانيك"  Organic Extracts

 

 

 

المجموعة اللي كانت متواجده تشمل فقط الشامبو والماسك ، لكن تغطي احتياجات عديدة

في مجموعة للشعر الدهني ، والمصبوغ ، والقشرة ، والشعر الجاف والمتضرر

انا مثل ما كتبت في تدوينة سابقة عن روتيني في العناية بالشعر ذكرت ان طبيعة شعري جاف - للعودة للتدوينه من  هنا 

 طول عمره جاف ، لكن بالنسبة لي افضل من الدهني بكثير ما احب الشعور الدهنية احسها تصير خفيفة بسرعة

كل اللي احتاجه هو الترطيب المكثف علشان يصير شعري زين .. وأحب ان الشعر يكون خفيف  يعني الشعره نفسها رقيقة وفيها Crisp يعني ما تكون مدهنه ونازله على تحت .. احب الفوليوم والكثافة .. رغم ان شعري مش دائما في هذه الحالة .. بس هذه هي الصفة المثالية للشعر بالنسبة لي ..

 

قبل لا ابدأ الريفيو عن الشامبو والماسك , وبطبيعة الحال اخترت مجموعة الشعر الجاف اللي تناسب شعري ، راح اتكلم شوي عن العناية بالشعر ...

لأنه مهما اشترينا انواع غالية من الشامبوهات والبلسم والأقنعة ، في شغلات لو ما كنا منتبهين لها شعرنا ما راح يتعدل .. لو شنو يصير ..

انا حالياً ما ادعي ان شعري بيرفكت ودايما في أحسن حالاته ، لكني الحمد لله قادرة اسيطر على ترطيبه وصحته الداخلية ..

 

بذكر بعض الأشياء اللي لازم ننتبه لها علشان نقدر نحافظ على صحة شعرنا :

 

- تشذيب أطراف الشعر بصفة دورية .. على الأقل مره كل شهرين إلى ثلاثة شهور  .. الخطوة هذه مهمة جداً علشان نتخلص من الأطراف الجافة والمتقصفة ، واللي يبون يطولون شعرهم أو ما يحبونه يصير قصير ، نقول للكوافيرة تقص أقل شي ممكن

ترى حتى لو خليتوه بتضطرون في النهاية تقصون منه وايد لأن كله بيخترب من تحت ويصير ماله معنى ولا حيوية .

 

-  التخلص من القشرة .. من أول وأهم الأسباب الغير معروفه في ظهور القشرة هي نقص عنصر النحاس و يعتمد بدرجة كبيرة على التغذيه .. اهم مسبب لنقص النحاس هو الإكثار من الوجبات السريعة و شرب الغازيات .. علشان اللي يفكرون ان التغذية مرتبطة فقط بالسمنة والضعف .. لا وألف لا .. تلعب دور في أبسط وأكبر الأمور .. لدرجة ان نقص النحاس الشديد يؤدي لتساقط الشعر من الأمام .. يعني الشعر يصير خفيف من جدام عند مقدمة الرأس للبنات والأولاد ..

وتقدرون تسوون بحث في قوقل علشان تتأكدون من كلامي

أول خطوه ان احنا نحسن تغذيتنا ونعتمد اكثر على الخضروات الورقية ومصادر البروتين الجيدة , الفواكه المجففه والحبوب الكاملة وشرب الماي .. هذي الأمور تضمن لج التخلص من القشرة في اسرع وقت دون الحاجه لمساعدة خارجية من شامبو ضد القشرة وغيره ..

في حال احتجنا مساعده ، شامبو نيزورال من افضل الشامبوهات اللي تقضي على القشره ، لكن لو ما كانت التغذية جيده ، راح يطيرها لفتره صغيره بس بعدين بترجع مره ثانية

وأهم شي ان ما تحكون الشعر ،، سوري في الكلمة اعرف انها مقززه بس بعض البنات يسوون الحركة هذه  ... بليز يا بنات تحملو تحكحكون في هالقشور!  تراه اول شي يلوع الجبد وحركة تدل على عدم النظافة .. وبعدين بتعدمون فروة راسكم وتهيجونها
تركو شعركم لا تلمسونه واول ما يدهن غسلوه على طول ..

 

- من أهم المأكولات اللي تخلي الشعر صحي ويلمع مثل الحرير هي المأكولات اللي لونها برتقالي .. مثل المانجا والقرع العسلي (البوبر) و البابايا والبطاطا الحلوة والمشمش وغيرها .. وتجي بعدها الحبوب الكاملة والبذور مثل بذور اليقطين والفلاكسيد ..  وانوه انها لا تقتصر فقط على هذه الأطعمه ، لكنها تعطي نتيجة اسرع في نمو الشعر ولمعااااانه يصير الشعر Silky

 

- علاجات الشعر تلعب دور ، بصراحه انا مش من هواة الزيوت ، لأني عارفة ان اغلب الزيوت الموجوده في السوق إما مغشوشه او مضاف لها نسبة كبيره من الزيت المعدني .. هذا المركب يرفع ضغطي .. اسمه Mineral Oil  وهو من مشتقات البتروليوم ..

علشان جذي مستحيل احب الفازلين ، مع احترامي للناس اللي يحبونه ، لكني اكرهه كره شديد ..
 صحيح هو يعطي ترطيب لكنه ترطيب وهمي أو سطحي ما يتعدى الطبقة العليا من البشره ، لأنها في الأساس ما تقدر تمتص هالزيت المعدني ..

لذلك استعمل علاجات بديلة ، وبكل صراحه اسويها في الصالونات لأني اتكاسل اسويها في البيت ..
 معظم الصالونات عندهم حاليا علاج الصبار والبابايا وغيرها من الماسكات .. بالنسبة لي أُفضل هذه العلاجات على الزيوت المغشوشه .. ولو توفر زيت ممتاز ما راح اتردد في استعماله ..

 

- بعض الصالونات تتسبب في دمار الشعر !! للأسف ..
 لما اروح الصالون اعرف لو كانو زينين او لا من طريقة تعاملهم مع شعري
 اللي تسحب وتشد ومستعجله هذي اقول لها باي باي .. وبعض الصالونات يتعاملون مع شعرج كأنه شعرهم , ويخافون عليه  لاحظت ان الجنسيات اللي تعامل الشعر بلطف هم التايلنديين  واللبنانيين .. اكثر ناس يفهمون في الشعر وما يشدونه
وبعد ما يخلصون لي سشوار مثلا ، يمسكون شعري بالعدال بطريقة لطيفه وأهم شي انهم  يضحكون :)
احرصو على الصالونات الزينه والنظيفه علشان ما يصير الشعر يتساقط من كثرة الشد ومن الأدوات الوصخه اكرمكم الله ..

 

الحين راح ابدأ بالريفيو عن الشامبو والماسك ...

 

 

* أولاً الشامبو :Insight Nourishing Shampoo - Dry Hiar

 

شامبو مرطب للشعر الجاف ، يعطي ترطيب عميق وتغذيه بمستخلص الشوفان العضوي

مثل ما ذكرت في المقدمة خالي من السالفات والبارابينز والملونات والعطور والسيليكون - صناعة إيطالية

قوامه : جيل شفاف

سعره : 5 دينار - الحجم : 500 مل

 

نتيجة تجربتي : شعري صار طري ولين ، واهم شي انه ما يثقل الشعر يعني رغم انها مترطبة تظل الشعره خفيفه وفيها حيويه مثل المواصفات اللي أحبها بالضبط ..

ويعطي لمعه جميله ، ما فيه ريحه مميزه طبعا لأنه خالي من العطور بس ريحته ريحة الشوفان الطبيعي وهي ريحه جميله غير مزعجه

 

 

بالنسبة للتقصف ، لأني توي مشذبه اطراف الشعر ما حسيت بفرق من ناحية علاج التقصف

واهم شي اني قاعده استعمل شي ما فيه مكونات ما احبها ..

إعادة الشراء : وارده جدا لكن شسوي احب اغير واجرب الجديد .. أول ما اخلص من شي اقول : اللي بعدووو :)

 

 

*ثانياً الماسك : Insight Nourishing Mask - Dry Hair

 

 

 

 

نفس نوع الشامبو ، مخصص للشعر الجاف .. وايضاً خالي من المركبات المذكورة بالأعلى

ينحط على الشعر بعد الانتهاء من الغسيل وأخر خطوة ، لمدة 5 إلى 10 دقائق

السعر : 4 دينار - الحجم : 250 مل

الحلو ان علبته على شكل انبوب ضاغط ، يعني ما يحتاج امد يدي في علبه علشان ما يتلوث المستحضر كله أو يدخل فيها ماي من الشاور

 

البلسم روعه ويعطي ترطيب مركز ، بس اغسله احس شعري انسيابي ومع الاستخدام المتكرر الشعر أقوى

الاثنين مع بعض عطوني نتيجة حلوه وشعر لامع وهش Crispy اتمنى تفهمون وصفي ، يعني الشعره لينه وتتشكل على كيفي

ما تكون ثقيله وطايحه ، لا أحب الشعر لما يكون فوق وفيه فوليوم وحجم ..

 

 

مكان الشراء : موجود في الصيدليات ، شفته في كذا صيدلية ..

وفي شي داخلي يحدني إني ما اذكر من وين شريت الأشياء ، الافضل إني بس اقول انه موجود في الصيدليات او في محلات المكياج
 

والسبب ان في وحده دخلت على حسابي في الانستقرام وقالت لي انتي تسوين دعايات حق المكان الفلاني والشخص الفلاني !!

ترى كل شي اشتريه بفلوسي !! يعني لازم احط الفاتوره ..
بصراحه هذي البنت جرحت شعوري وايد وانا ما اسوي اي دعايات لحد الآن

ليس انتقاصا للي يسوون دعايات ما فيها شي والله ، اللي تسوي تكون استحقت هالشي بحكم مصداقيتها وثقة الناس فيها

لكن انا الاشياء اللي اسوي عليها ريفيو كلها شاريتها بفلوسي الخاصة .. ما عدا مره واحده حصلت هدية من عند متجر عطور ..

 

في الختام ، حبيت اقول ان بعض البنات شعرهم خالي من المشكلات بطبيعته ، يعني من الله ويمكن ما تشوف اي معنى للكلام اللي ذكرته .. بس ما نكون انانيين ترى وايد ناس تعاني من شعرها ولازم نتعلم نحب نفسنا مثل ما احنا ونسعى علشان نحسن من نفسنا

 

والسلام ختام :)   بــــــــــــــــاي