Timeless fragrances .. . my special treasure perfumes collection نوادر العطور ... مجموعه حصريه ونادره

 

 

 

 

مساء الخير ..

 

 

اليوم راح آخذكم معاي في عالم الكلاسيكيه .. تدوينه مختلفه ومميزه

أول شي ، انا سعيده جدا لأن العطور اللي عندي أنضاف لها مجموعة نادره وحصريه ومب متواجده بسهوله

والحمد لله إني حصلت هذي العطور المميزه  .. وافتخر انها صارت عندي  ..

مع انه ما كان على البال ولا الخاطر اني احصلها ..

 

 

 

 

بداية الموضوع ، كانت صدفه في الانستقرام ..

 كالعاده أقعد اطالع في حساب البوبيولر ولقيت صورة عطر ما أعرفه ،

 دخلت على طول على الحساب "بحكم فضولي وشغفي للعطور"

قعدت أقرا وأقرا في البوستات اللي مكتوبه ، واعجبت بصراحه بكذا شغله ...

 

الحساب اسمه "قطرات الروح " soul_drops

 

- الحساب يقدم مجموعة عطور حصريه ، إما ان تكون من عطور "النيش" Niche ، او تكون عطور ديزاينر ، أو عطور من شركات غير متواجده ولا معروفه في العالم العربي ... بالإضافه للعود ودهن العود ، والمسك والعنبر الخالص وغيرها الكثير

 

- صاحب الحساب يتكلم بكل صراحه عن العطور ، ينتقد السيء ويظهر محاسن الجيد بدون تحيز

 

- اسعار العطورات متفاوته .. في الرخيص وفي المتوسط وفي الغالي وفي الغالي جدا جدا

حسب الشي المعروض ..

يعني في أنواع خاصه من العود ودهن العود معتقه وقديمه ، وتركيبتها خالصه علشان جذي سعرها مرتفع

وفي عطور حصريه Exclusive مب متواجده إلا في البوتيكات  على سبيل المثال لا الحصر ، من ضمن العطور اللي جفتها عندهم هي كارتييه ، كلايف كريستيان , كريد

ما أبي اظلم الحساب بصراحه لأني أكيد ناسيه أكتب أشياء وايد

 

 

عن نفسي ، بصراحه مستحيل اشتري شي من الانستقرام .. عشان اكون صريحه معاكم

مادري ليش ما عندي ثقه ، لازم اروح بنفسي المحلات واشوف الأشياء بنفسي

بس مادري شنو السبب اللي خلاني عندي ثقه فيهم ، اتوقع ان الأمانه هي اللي عطتني شعور بالارتياح ..

عادةً اشتري العطور اللي احبها من المحلات ، واللي مب متواجد اشتريه من دبي أو لما اسافر

لأن مافي ولا ويب سايت يشحن عطور ، بسبب طبيعة العطور المضغوطه ، مكوناتها ، وتركيبة معظمها القابله للاشتعال

 

 

 ابتداءً من الاسبوع اللي طاف ، صار في عروض وخصومات

حبيت استفيد منها ، ما اقدر اصبر كالعادة .. وكانت هذه طلباتي من عندهم :

 

 

 

 

مسك الغزال الطبيعي (ربع توله )

 

طاحت عيني على مسك الغزال الأصلي ، لأني بصراحه من كثر ما صرت أسمع عن الغش في العطور

خصوصا المسك ، معظم المحلات (حتى المعروفه) صار ما عندها مصداقيه وصارت تجاريه أكثر

يضيفون كحول ومركبات ما يصير نستخدمها مباشرة على الجسم

وانا من زمان كان خاطري في مسك خالص ..

اللي متواجد عند حساب "قطرات الروح " مسك الغزال الخام (صافي أو بيور)

سعر التوله الواحده 2000 ريال (يعني 200 دينار)

يعني ربع التوله بيكون بــ 500 ريال (50 دينار) لكن كان في عليها خصم خاص بحيث ان سعرها صار 250 ريال

 

 

عنبر الباهاماز الأشهب Grey Ambergris Bahamas

 

 اقتباس من  وصف صاحب الحساب "العنبر الأشهب أو الرمادي الفاتح هو الأجود "

 

أكذب عليكم لو قعدت أفتي في هذه العطور ، وهني تكون المعضله وتكلمت عنها من قبل في كذا تدوينه

البلوقر تظن انها لازم تكون "انسان خارق" ، سوبر وومن

تفهم في الماركات ، وتعرف تمكيج نفسها وتمكيج خواتها وتمكيج الجيران ، يعني ميك اب ارتست

وتكون خبيره عطور .. وفنانه في المطبخ ، وتسوي أعمال يدويه .. ومحلله نفسيه !! ترى مو شرط كل الصفات هذي تجتمع

المفهموم الحقيقي للبلوقرهو كتابة التجارب بكل صدق وبحياديه بدون تحيز

واظن انه من غير الضروري ان البلوقرز يحطون على نفسهم ضغط كبير

 

(وفوق كل ذي علم عليم )

 

انا عن نفسي مب خبيرة عطورات ولا شي ، بس الحمد لله متأكده ان كل العطور اللي اختارها حلوه :)

 

ننتقل للي بعده ...

 



 

 

 

دهن عود كمبودي نادر

 

شهالزين شهالجمال .. فخامه ودلع .. خصوصا للشتاء هالأيام

واحنا تونا ما دخلنا عدل على البروده اللي في يناير ، هالوقت هو وقته ..

 

 

 

 

 

بدون مبالغه بس نقطه وحده حطيت على رسغي وكل شوي اغسل يدي او اتوضأ ، تصير يدي تطبخ مع العطر ، فوّاح جداً

يبي له بس نقطه وحده كل جهة مو أكثر ، اتوقع يظل لفتره طويله لأن شوي منه بس تكفي

كلما هدأ كلما صارت ريحته أحلى .. في البدايه شي طبيعي ان ريحته راح تخترق جميع الحواس ..

 

 



خلصنا من الدهون .. ننتقل للعطور

 



 

عطر بيورو تالكو Puro Talco

 

مغزى العطر واضح من اسمه ، مشتق من كلمة تالك ، يعني بودره

ريحته بودريه نقيه ، بارده ، هادئه ومسالمه ...

 

 

 

 

يشبه عطر لورينزو فيلوريسي "تان دو نيج" الى حد كبير

صايره أحب هالعطور بصوره أكبر ، مادري شنو تحسسني فيه ، بحنان وهدوء نفسي

بما ان العطر توه واصل لي ، ما جربت ثباته للحين عدل عدل ، لكن من الصبح للحين رشيت منه والريحه ما زالت موجوده

صالح للاستعمال على الجسم مباشرةً وعلى الملابس ، ما منه مضره على الجسم ومذكور هالشي على زجاجة العطر

آخر شي مكتوب تحت For Body and Textile

 

 

 

 



عطر شانيل نمبر فايف بيور ، نسخه صافيه بدون كحول Chanel N5 Pure/Alcohol free formula

 

 

شانيل نمبر فايف موجود عندي ، لكن الملفت في الموضوع التفاصيل المذكوره

راح اكتب اقتباس هالفقره من عندهم ، والكلام على لسان صاحب الحساب :

"علاقتي مع هذا الكائن العطري وثيقة جدا ، بطبيعة الحال لا اتحدث عن المنتج الذي يباع حاليا في الاسواق ، اتحدث عن ما قبل العام 1998م فما بعد هذا العام ليس شانيل 5 ، ترى ما هو السر ؟ عطر كوكو شانيل 5 هو ثورة عالمية في صناعة العطور وهو أول عطر يصنع من مركبات متعددة الطبقات (نوتات) تدوم لقتره طويله جدا وتتحول من طبقة عطريه الى اخرى دون ان تفسد رائحة العطر بل تتحول إلى رائحة أجمل ، نعم هذا هو شانيل 5 الحقيقي ، الذي صنع في العام 1921 م ليكون عطرا بالغ الخصوصية توزعه الانسة كوكو شانيل على زبائن متجرها المميزين فقط ....... عوده لبداية كلامي ولماذا شانيل 5 الحقيقي لم يعد ينتج بعد العام 1998 م ، السبب ان المصنع كان يستخدم مكونات خاصه تستخرج من غدد قطط السيفيت ، وطيلة سنوات عديدة والجماعات الناشطة في حقوق الحيوان تقيم الدعاوى ضد الشركة المصنعة ، حتى تمكنت الجمعية العالمية لحقوق الحيوان في العام 1998 م من ايقاف الشركة المصنعة عند حدها وتوفقها عن استخدام هذا المكون والتعديل في تركيبة العطر وفقدانه التام لهويته الأصليه " انتهى الاقتباس ..

 

 

عطر كوكو شانيل (عتيق) Vintage Coco Chanel Perfume

 

ايضا هالعطر ما عاد متوفر في الاسواق ، وهو الصيغة الأصليه من كوكو شانيل

ريحته مختلطه حسب تقييمي انا ، احسها مزيج خشبي زهري .. وشميت العطر من الزجاجه فقط

بكل صراحه لحد الآن ما استعملته ، ان شاء الله راح استخدمه واكتب تجربتي المفصله في مرات ثانيه او على الانستقرام

 

 

 

الزجاجات فيها اناقه ، حتى الغلاف مميز عن الغلافات الحالية

غير مزوده ببخاخ ، تنحط مثل دهن العود .. انا راح اوفر لها غطاء مناسب مال دهن عود عندي من قبل علشان يسهل على وضعها

هالعطر مع شانيل نمبر فايف اثنينهم مزودين بقفل عليه ختم شانيل ، بالأحرى Sealed يعني هذه الدائره السوداء

كانت تستعمل حتى منتصف القرن الماضي كدليل على ان الشيء لم يتم فتحه ، حتى للرسائل

والصوره اخذتها قبل لا افتح العطر ، مثل ما تجوفون ما زالت في حكم (مغلق بالشمع الأحمر )

 



 

ختامها مسك مع رذاذ شانيل نمبر فايف للشعر ، هديه مميزه من المحل مع باقي الشحنه

وصلتني على فكره خلال 48 ساعة لحد باب المنزل ..

منتهى الذوق والحرفية في التعامل ..

 

 



 

 

اتمنى يكون الطرح عجبكم ، ولو عندكم اي سؤال ترى اجابتي ما بتكون وافيه مثل صاحب الحساب نفسه

 

قطرات الروح ... Soul_Drops