Chanel Hudra Beauty Creme - رفيو كريم هايدرا بيوتي من شانيل

يا مساء الخير ...

بما ان دخلنا فصل الربيع ، صار الوقت مناسب ان احنا نتخطى آثار الشتاء السيئة على بشرتنا وجسمنا

بعض الناس يزيد وزنها في الشتاء , وانا منهم .. من كثر شرب الهوت جوكلت واكل الحلويات بحجة تدفئة الجسم والحصول على الطاقة :)

ومن ضمن الأشياء المترتبة على فترة البرد اللي مرت ، جفاف وجهي ..

تغير نوعية البشرة وطبيعتها شيء وارد جداً وطبيعي وله أسباب معينة

في ناس تتحول بشرتهم من دهنية للجافة ، بس الجافة نادرا ما تصير دهنية  ، ممكن تكون معرضة للحبوب والرؤوس السوداء أو البيضاء خلال فترات معينة

سواء مع تغيير الجو (مثل حالتي) ، او نوعية الطعام والنفسية

 

نرجع لموضوع الريفيو ..

كنت رايحة على أساس اشتري كريم من شانيل مادري شاللي خلاني اتذكره فجأة

استعملته قبل سنة تقريبا أو أكثر ، مادري ليش ما كتبت عنه مع انه ممتاز

 

هو كريم خاص لتعزيز النضارة وإراحة البشرة  

هذي صورته

 

 

كان فظيع وقدرا اشوف نتائج واضحه لما كنت استخدمه

بس الموظفة قالت لي انهم اوقفوه خلاص وما راح احصله في أي مكان

ونزلو كريم ثاني مكانه يحمع بين ميزة النضارة والترطيب

قلت يالله ما عليها ، بجربه

 

 

 



 

  

 

 

 

اسم الكريم : هايدرا بيوتي كريم - من شانيل طبعاً

HYDRA BEAUTY CREME - CHANEL

HYDRATION, PROTECTION, RADIANCE

 

متوفر بصيغة الجل والكريم ، انا اخذت الكريم بما ان بشرتي حالياً شوي جافة 

سعره : 26 دينار (260 درهم - ريــال) 

 

تجربتي : أول استعمال كان ذا فائده ، حطيته في الليل وقعدت الصبح الشد الناتج من الجفاف خف بصورة كبيرة

بعد مرور 3 ايام ، طلعت لي حبوب صغيره ، بس اكتشفت انها من غسول جديد توي شاريته

لأن الحبوب راحت لما وقفت الغسول

بعد عشرة ايام تقريباً ، تحسن واضح في راحة الوجه ، واحب استعمل هالتعبير لأنه يعبر عن الحالة اللي أحسها

القسمات تكون ريلاكس أكثر وكأني نايمه أكثر أو واخذه استراحه والتنشن والجفاف اللي كان موجود في البشرة خف   

من ناحية النضاره ، ما عطاني نفس نتيجة الكريم اللي كنت أدور عليه

لكن مرتاحة وراضية عن النتيجة

 

طريقة الاستخدام : بعد غسل وتنظيف البشرة يستعمل في الصباح والمساء

ممكن الصباح بس أو المساء بس أو بالتناوب ، حسب اللي يريحج

وممكن استعماله تحت المكياج

وهذي أهم نقطة ، بعد ما يجف وأحط المكياج رصدت تغير إيجابي ومكياجي صار أحلى عليه 

وما ينشف كريم الأساس ابدا ولا يقطع ، صرت أمده بصورة أسهل كثير من قبل

 

 

 

 

 

 

 

 

 

في النهاية حبيت أقول شي ، لسبب معين في شي داخلي يخليني مو مقتنعة بمنتجات شانيل للعناية بالبشرة

بس مكياجهم وطبعا خط الموضة من شنط وجلديات وعطور وملابس ... الخ

 

أشياء محدودة من خط العناية عجبتني ، منها هالكريم وكريمي السابق   

بين فترة وفترة حلو ان اجرب اشياء كنت مبتعدة عنها .. التجربة خير برهان :)

 

اشوفكم على خير مع موضوع جديد