مقتنياتي من جو مالون My Jo Malone Collection

 

هــاي

 

اليوم باختصار راح اسوي عرض بسيط لمجموعة العطور اللي اقتنيها من جو مالون

الغرض منها مب الاستعراض أو مثل ما نسميه (المفوشر) ...

أولاً لأن في الأساس مجموعتي تعتبر صغيره مقارنةً بما يقتنيه بعض عشاق جو مالون

والسبب الثاني هو اني فقط حبيت انقل لكم تجربتي معاهم ، خصوصا بعد ما فتح محلهم في البحرين

 

 

أول شي : مجموعة الورود Red Roses

عندي العطر الصغير (تواليت) وكريم الجسم وصابونه

المجموعه هذه شريتها في لحظة تهور ، لأن اول ما وصلت السوق وجفت المحل جدامي

ما عرفت شنو اشتري وما كان عندهم شي جديد نازل

قمت شريتهم

ريحة المجموعة ريحة الروز العادي ، بدون أي إضافات

وبصراحه ما تفرق شي عن الروز اللي من ماركس اند سبنسر أو اي روز خالص ثاني

لكن الفرق طبعا من ناحية الثبات وتغير العطر ، يعني مع الوقت ما تتغير ريحته

أحب استعمل الكريم وفوقه رشه من العطر كأساس لعطر ثاني

أما الصابونه لحد الحين ما فتحتها بصراحه .. بستخدمها جريب

 

 

 



تواليت بيوني أند بلش سويد  Peony & Blush Suede 

من أكثر العطور اللي احبهم من عندهم ... ريحته خفيفه لكن لها حضور

ومهما كثرت منه ما تطيب النفس منه - تغلب عليه رائحة زهره البيوني أو (الفاونيا)

تواليت فانيلا أند أنيس Vanilla & Anise

ريحته مزيج خشبي مع الفانيلا

يناسب الشتاء أكثر ولما احط عليه رشه من عطر ثاني تبان أكثر نغمات الفانيلا

باختصار .. عطر سعيد 

 

 

مجموعة لايم بازل أند ماندرين Lime Basil & Mandrin Collection 

 

خليط غريب من الريحان والماندرين .. هذه هي أشهر مجموعة من جو مالون

والأكثر مبيعاً في الغرب ..

ياتني هديه ، كريم الجسم واو دي تواليت وصابونه

لكن ما حبيتها أبداً :(

تذكرني في نوع من الكولونيات الرجالية ، او كولونيا قزاز اللي نستخدمها بعد ما ناكل سمك

لكنها الأكثر طلب وعلى طول مخلصه في اوروبا .. سبحان الله مادري شلون الأذواق تختلف 

تواليت بوماقرانيت نوار Pomegranate Noir 

عطر فاكهي غامض .. ترى مو شرط عطور الفواكه تكون ريحتها سويت

هالعطر يصلح لليل أكثر أو لفصل الشتاء

ريحته بعيده جدا عن شخصيتي ، لما شميته في المحل قبل لا اشتريه كان عاجبني

لكن لما بديت استعمله استغربت انه كان عاجبني ..

ريحته ثقيله ، لما يبرد يصير أحلى



 

 

 

للأسف في بعض الأشياء استعملتها وخلصت .. ما بيصير اتكلم عنها

وكلما شريت شي يديد راح اضيفه للقائمة هني

 

بآي