Green Bar - A botanical beauty secret قرين بار - سر طبيعي من اسرار نقاء البشرة

مساء الخير

اليوم التدوينة متحمسة لها وايد ، لأني أحب المنتج بصورة غير طبيعية

وفي كذا سبب يبرر حبي للشي اللي بتكلم عنه اليوم .. بتكلم عن أسباب العشق بالتفصيل  :)

 المنتجات من شركة متخصصة بمستحضرات البشرة/الجسم/الشعر  الأورجانك أوالعضوية

وأسمها (قرين بار)  Green Bar

كل منتجاتهم مصنوعة بكل فخر في مملكة البحرين !!  والشركة انوجدت من عام 2006م

وما تخيلت أبدا ان في منتج محلي بيكون بالجودة هذه ، للأمانة


 

مب مسألة ان ما عندي ثقة في منتجات بلدي .. بالعكس

لكن بشكل عام ، تعرفون طبيعة شريحة كبيرة من العالم العربي هو : عدم إتقان الشي ..

 

لكن ما تتصورون شكثر هالمنتجات متعوب عليها !! كل شي بيور ، طبيعي 100%

ومب بس طبيعي وعضوي ، لكن المواد الداخلة في التصنيع بعد مب أي كلام

يعني ماي الورد يستوردونه من تركيا والمغرب وفي موسم القطاف مباشرة

وكل منتجاتهم نباتيه Botanical يعني مافي اي شي مشتق من منتجات حيوانية

لأن معروف المنتجات اللي تكون محتوية على مشتقات حيوانية ممكن يكون لها تأثير هرموني كبير على جسمنا

القناني اللي فيها المنتجات معاد تدويرها Recycled وجودتها عاليه

لأنها كلها زجاجيه ولا شي بلاستيك , وبعد معتمه أو قاتمة بحيث ان المركب ما يخترب من الضوء

والشكل .. جمييييل .. كل منتج محطوط عليه تاق على شكل رسمه دائريه ومربوط بحبل لونه جميل

ومكتوب على التاق من ورا اسم المنتج وطريقة استخدامه

في أحلى من جذي :’(

 

الزيوت اللي يستخدمونها كلها معصوره على البارد Cold Pressed ومافي اي شي صناعي داخل فيها

المعلومات هذه اخذتها من موقعهم وكان ودي اراسلهم وآخذ معلومات أكثر ..

لأن ما تتصورون شكثر  شغلهم متعوب عليه
أكتشفت ان ارقى الفنادق يستعملون زيوتهم ومستحضراتهم للمساجات مثل سبا كمبينسكي وسبا في رفاع فيوز ..
 

 

يعني أول كأن ماي الورد اللي كنت استعمله قبل كان ماي عادي واللي من عندهم هو ماي الورد الحقيقي

والأغرب أن منتجاتهم لها شعبية كبيرة في دول ثانيه عن طريق الطلب أونلاين !!

وجفت ناس من امريكا كاتبين تعليقات عن بعض المنتجات

اعتبرها خسارة لما احنا ما ندعم منتج وطني أو عربي بشكل عام بالجودة هذه والغرب يقدرون الكواليتي ويشترون منهم

ما بيخلص الكلام لو قعدت أتكلم عن هالموضوع ، لذلك  ندخل على الريفيو ..

 

 

 اخترت اليوم منتجين من عندهم وأحبهم بجنون .. هم كالآتي :

 

ماسك الأزهار   - Flower Mask  

تونيك ماء الورد التركي  -   Turkish Rose Plant Water Tonic

 

1- ماسك الأزهار :

 

الماسك غريب .. بشرح لكم مواصفاته وطريقة استخدامه بالضبط .. علشان تستفيدون منه أكبر استفاده

مكون من خليط من  الطين العضوي  " Rhassoul clay " بتلات الورد المطحونه و اوراق الحنه

بودره معتبره :)  

غني بالمعادن المنقية والمضاده للسموم ، ينير وينقي الوجه

 

له كذا طريقة للاستخدام ، يعني ممكن يستعمل كغسول وممكن يستعمل كماسك (قناع)  وأخيرا ، كمقشر
مثل ما تجوفون في الصورة تحت ، عباره عن بودره ..

 

طريقة استخدامي له كماسك مرتين في الاسبوع هي المفضلة عندي ..

أول شي ، آخذ تقريبا ملعقة الى ملعقتين صغار من البودره واحطها في اناء نظيف وفاضي



 

 

ملاحظه للمدرعمين الفاضيين : ترى عندي جميع انواع البولات والآنيه الخاصه بالمساكات والخلطات

لكن في محل قرين بار جفتهم يبيعون نفس الاستكانه مرسوم عليها ورد يغلب عليها الطابع الخليجي القديم

وحبيت الفكره ، قمت طخيت وحده من استكاناتنا مشابهة لها وعلى طول استعملها مع الماسك

 

وبعد ما احط كمية البودره في الاستكانه ، المفروض ينحط عليها قطرات من ماء الورد اللي بتكلم عنه بعد شوي
لكن بصراحه سعره مب رخيص ... قمت استخدم ماي ورد عادي ومشى الحال




 

 

 اول ما تنخلط البورده مع ماي الورد تتنشط المركبات النباتيه وتبدا تعطي مفعولها

أهم شي يتكون عندنا خليط لزج قابل للتوزيع على الوجه

لأني اول مره حاولت اسويه ما طلعت بالقوام الصحيح كانت شوي ناشفه وما توزعت عدل على بشرتي

تقريبا هذه هي الكثافة المطلوبة

 

 

يترك المزيج على الويه عشر بين 10-20 دقيقة وبعدها واحنا نغسله نسوي حركات دائريه كأننا قاعدين نقشر

بعدها نرش ماي الورد على الويه ونرطبه ...

 

السعر : 23 دينار .. حجم العلبة 60 جم

 

النتيجة : نضاره وصفاء في الويه ، ازالة لآثار الحبوب وترطيب متوسط

أهم نتيجة بالنسبة لي ، مافي أي شحوب في الوجه ودوم لونه نضر وزاهي

2-  تونيك ماي الورد التركي - Turkish Rose Plant Water Tonic 

 

هو بديل للتونر العادي ، للاستعمال اليومي بعد غسل البشرة و قبل الكريم 

في عندهم نوعين من التونر ، اللي عندي هو ماء الورد التركي ، والنوع الثاني ماء الورد المغربي

التركي مركز أكثر وقوي ، المغربي أخف

 

 

انا عجبني أكثر التركي لأن حسيته وااااايد مركز وقوي ، لكن في ناس ما تتقبله مثل أمي

تفضل المغربي .. وانا ان شاء الله المره اليايه باخذ المغربي
لأن ساعات أحس ان ريحته قوية شوي ومركزة بدرجة كبيرة

لكن ما اقدر اوصف لكم ، مباشرة بعد الرش أحس ان ويهي صار هاديء وبارد

السعر : 14 دينار

ممكن البعض منكم يظن ان هالأشياء عادية كلش .. مجرد ماسك وتونر
لكن بالنسبة لي ، تسوي لي فرق واضح في "نقاء" البشرة
يعني اللون يظل على طول زاهي ، حتى في الأيام اللي أكون فيها تعبانة بس استخدم الماسك والاحظ تحسن
وانا كنت أدور على منتجات طبيعية ، سواء للبشرة أو للجسم .. وسبق كتبت تدوينه عن شعر من العناية الطبيعية ، الرابط هنا
لكن للأمانة معظم المستحضرات الطبيعية ما تعطي نتيجة واضحه
يعني لازم الكريمات اللي مضاف لها مركبات كيميائية هي اللي لها طبيعة علاجية للبشرة

لكن مع استخدامي للماسك وتونر الورد ، بس يبي لي ارطب عادي وما يحتاج لي عناية كبيرة
عطوني بعد سامبل من إكسير البشرة (يحل محل السيروم) وكان حلو ، اقكر اشتريه لكن مب الحين لأن عندي اشياء وايد بخلصها
صحيح ان منتجاتهم محدودة ، وأتمنى ان يكون في أشياء ثانية أكثر
لكن أتوقع ان خطواتهم مدروسة ، ما بيصدرون شي أي كلام
ومع الوقت في كذا شغلة زادوها .. بجربهم ان شاء الله جريب

حبيت هالمنتجات وايد ، للأسباب التالية :
- أورجانك / عضوية 100% والمواد المستخدمة جودتها عالية مو أي كلام
- في اهتمام كبير بالتفاصيل من ناحية التغليف ، شكل العلب ، الرسومات اللي على التاقز ، يعني ماي الورد عليه تاق ورد
وزيت الياسمين عليه تاق ياسمين ، الخ ..
- صنع في مملكة البحرين الحبييييبة بكل فخر
- أهم شي ، مستحضرات ذات فعالية


ملاحظة : اكتب رايي بكل مصداقية ، وكل المشتريات من فلوسي الخاصة
اتمنى تكون التدوينة عجبتكم اليوم ..