مقارنة لمجموعة من الديودرانتس / مزيلات العرق بمكونات لطيفه A Comparison of Mild Deodorants

هاي ~ شلونكم ؟؟

اللي شاف بعض من تدويناتي الأخيره أو حسابي على الانستقرام ، بيعرف إني قاعده أحاول
أدور بدائل للمنتجات العادية ، واستبدالها بمنتجات عناية بالجسم والبشره بمكونات طبيعية أكثر
أو أقدر أقول بمعنى أصح ، ابتعد عن المركبات السمّية (Toxins) او المعقدة كيميائياً
ما يكاد يخلو أي منتج عناية أو تجميل منهم !!
لكن بما أن منطقة الأبط منطقة حساسة ومرتبطه بالصدر ، كانت من أولويات اهتماماتي
وحاولت قدر الإمكان استعمال مزيل للعرق بمكونات لطيفة

 

 

أول شي ، انا طول عمري ما استعملت مضادات العرق لأن الوالده مانعتهم عنا ، وهم اللي مكتوب عليهم " Anti-Perspirant "
كنا نستعمل ديودرانت " فا Fa " العادي أذكر ، كانت ريحته مختلفه عن الحين وكان فيه عطور كيوي وبارادايس وايد كنت احبهم
وبعدين مره قررت أجرب انا مضاد العرق من نيفيا من كثر ما يحطون دعايته في التلفزيون ، شفتو شكثر الإعلانات تأثر على المراهقين !!
يمكن كان عمري 16 رحت وشريته اللي هو بلمسة القطن ، ما جاني منه قطن ولا هم يحزنون
ريحه خانقة تدخل في البلاعيم ويترك أثر أبيض على الأبط ، ويوصخ الملابس
لازم مريولي كان يتوصخ منه
والأغرب هو الصوت اللي يطلع من العبوه لما ابخه ، كأن في شي مضغوط وبالغصب يطلع
أقرب صوت له هو الصوت اللي يطلع من عبوة موس الشعر .. نفس الشي تقريباً



بعدين عرفت شكثر أمي صاجه ، للأسف المراهق ما يدري أن والدينه يبون له الخير ولازم يعاندهم 
وكانت هذه المره الوحيده اللي استعملت فيها مضاد التعرق
من بعدها ، استعملت الديودرانت اللي لحد اليوم ما زلت استخدمه وما اقدر استغنى عنه
هو ديودرانت أديداس
أعرف ان ناس وايد ما يحبون السبراي (او البخاخ) بالنسبة لي هذا البخاخ الوحيد اللي يعجبني
وأعيد اشدد على انه ديودرانت وليس مضاد للتعرق ، لأن اديداس عندهم ايضاً مضادات تعرق على شكل بخاخ وروله
لكن اللي استعمله هو هذا النوع









في منه كذا لون بعطور مختلفه ، المفضل بالنسبة لي هو الأخضر اسمه Floral Dream
ولا مره حسس لي منطقة الابط ، ولا يسوي سواد فيها رغم ان بشرتي حساسه
مادري بصراحه ممكن احد ثاني يستعمله يصير له ، لكن تجربتي معاه مافيها اي مشاكل
وبما اني انسانه عاديه طبعا اتحرك واطلع في الحر والعب رياضة أكيد اعرق مافي منها خجل
لكن ولا مره والحمد لله طلعت مني ريحه أعزكم الله
بالنسبة لمكوناته ، مقبولة بالنسبة لي .. مو سيئة لدرجة انه يكون خطير
لكنه معطر ، اللي يتحسس من العطر يبتعد عنه رجاءً
استعمالي له حسب الضروره لكن مو كل يوم
حطيت له الوصف هذا بروحه لأنه مختلف عن البقايا اللي بتكلم عنهم واقارن بينهم في القسم التالي
ما يصير أقارنه فيهم لأنه مختلف عنهم






أما القسم القادم ، فهو عباره عن مقارنه بين مجموعة من مزيلات العرق بمكونات لطيفة (أو شبه لطيفه !!)
لأن حتى اللي مكتوب عليه خالي من كذا وكذا وكذا ، لا يخلو 100% من المركبات الكيميائية
لكن يعوضونها بمركب بديل .. يمكن يكون أخس وأدمر منه لكن الناس ما تعرف ضرره لحد الآن
على سبيل المثال .. يشيلون البرابين والناس تنبسط ، ويعوضون هالمادة الحافظة بمركب هيدروكسي ميثيل الصوديوم
الناس تعرف البرابين بسبب الهوجه اللي صايره عليه ، لكن ما تعرف المركب الثاني
لأن الناس الأيام هذه هابين في (خالي من البرابين) وهي نوع من المواد الحافظة
ووجهة نظري شبه مقتنعة مع الرأي هذا (الابتعاد عن البرابينز Parabens)
ما احب اتطرق للموضوع الحين لأن عليه الكثير من اللغط بين العلماء نفسهم ومافيه لحد الآن اي تعميم
في الأساس البرابينز موجودين في بعض النباتات ذات الخواص المضادة للبكتيريا والفطريات
لكنهم صارو يصنعونها بتركيزات قوية علشان تحفظ الكريمات وغيرها من انها تتلف بسرعة
وفي رأي يقول أن وجودها لحد تركيز25 % في المنتج ماله أي ضرر
في الوقت اللي معظم المنتجات تحتوي على نسبة لا تزيد عن 0.10 % يعني أقل من واحد في المئة
والبعض يقول أن الشركات باتت تستخدم البرابين كورقة تسويقية
علشان جذي ما راح أعمم شي عن البرابينز حتى إشعار آخر
والخلاصة أن رأيي يميل للتخلص من البرابين لأسبابي الخاصة وما أبي أأثر على الناس برأي ايجابي أو سلبي





نرجع للريفيو عندنا اليوم ومجموعة من مزيلات العرق (شبه الطبيعية) اللي جربتهم ومقارنة بينهم
ملاحظه : اختياري للأنواع تم بشكل عشوائي جداً وكل التقييم بناءً على رأيي الشخصي بدون تحيُز
يعني صادفت اني لقيت الأنواع هذه وجربتها














ديودرانت ايف روشيه

 

متوفر بدون عطر وبكذا عطر منها اللافندر ، القطن والمفضل عندي هو اللوز
خالي من البرابين ، أملاح الألمنيوم والكحول
ريحته منعشة جدا ، سرعة الجفاف مقبولة يعني ما يعطل عن اللبس وايد
ما يترك أي أثر على الجسم ولا الملابس لأنه شفاف سائل
السعر : كنت اشتريه من السعودية (الخبر) بكمية كبيرة
لأن المحل غير موجود في البحرين (الله يزيد ويبارك في الاسواق السعودية قلب قلب قلب )
كان بـــــ 15 ريــال آخر مره رحت اشتري مؤونتي لقيت سعره صار 25 ريـــال





ديودرانت بيز لاين

اتوقع الكل جرب بيز لاين
انا استعملته أول ما نزل في الأسواق البحرينية وما كان أي احد يعرفه
يتميز بأنه يفتح المنطقة تحت الأبط
ما أحب ابين إني قاعده افوشر واهايط ، لكن لله الحمد ما قط عانيت من سواد تحت الابط
وترى لو عندي أي مشكلة ما استحي إني اقولها 
وهني يجي دور العناية والاهتمام .. لمعالجة مشكلاتنا والحصول على لقب ملكة الجمال والأناقة
وبعدين صارو بصراحة ينرفزوني اللي يطلعون على الانستقرام ويكتبون (انا الخيل اللي مدري شنو )
خاطري اجوف يا ترى شنو شكلها على هالوصف
ولا على سبيل المثال : اللي تقول بنات جربو هالشامبو بينفعكم ، انا ما عندي اي مشكلة في شعري لكن حبيت افيدكم
والشامبو خاص للشعر الجاف أو المتساقط !! عيل شنو يسوي عندج الشامبو وليش شريتيه ؟ للزينة ؟
مافيها شي لو كان شعرج جاف ، كلنا نعاني من نوع معين من المشكلات
يعني تستحين تقولين ان شعرج جاف ؟
مو ضروري يكون كل شي بيرفكت علشان تصيرين مدونة أو أخصائية تجميل
ومحد قال ان البلوقر لازم تكون ملكة جمال وإلا محد راح يصدق كلامها !!
والكامل الله سبحانه وحده ولا أحد غيره
هالنوعية مالها أي مصداقية عندي



اسمحولي كذا مره أطلع عن سياق الموضوع اليوم .. خبركم الفراغ وعجايبه مو مستعيله ما وراي شي


السعر : 5 دينار ونص ( 55 ريـــال / درهم ) ، اذكر اول مره شريته كان سعره دينار ونص !! يعني 15 ريــال قبل تقريباً
المشكلة فيه انه ما ينشف بسرعه ويترك أثر أبيض
قوامه لزج .. آخر شي قمت أحطه واضغط بقطنه علشان الزياده تنشف
متوفر بدون عطر وبعطور متنوعة .. أكثر واحد أحبه هو الورد
ريحته حالمة وجميلة وايد وايد
مقاومته للعرق جيده ، يصمد طول اليوم
حسيت أن المنطقة فعلا صارت منورة أكثر
ويمكن اللي تعاني من سواد بسيط اللي ينتج عن الاحتكاك بتلاحظ الفرق أكثر
وأهم شي طبعا تلبسون قميص داخلي 100% قطن بنصف كم (مو حفره) ولا كم قصير يدوب يغطي الابط ما راح يسوي فرق بيظل فيه احتكاك
هالشي اتبعه من أيام المدرسة تحت كل شي البسه
يمكن هو اللي منع مني مشكلة الابط بلون أغمق من لون البشرة
طبعا ما عدا في المناسبات ومع الفساتين والقمصان المزلطية الحفرية
لكني عارفه في قرارة نفسي انه خلال العرس وخلاص ، او خلال جمعه أو زياره فترتها قصيره
وما بيكون في مجهود ، يعني مو رايحه السوق ولا بلعب رياضه بحيث تكون فتره طويله تأثر علي
بس تصدقون إني ما احب البس حفره وايد ؟ (حسب وجهة نظري الشخصية)
المفضل عندي كم صغير اللي يصير ناعم وطايح ، ولا إني استعرض عضلاتي
و احس شوي بعدم الارتياح




ديودرانت دكتور هوشكا Dr.Hauschka

رغم ان هذه الشركه مختصة بالعناية الطبيعية ، إلا ان ديودرنتهم ما عجبني
يفتقر لكثير من مقومات مزيل العرق البيولوجي ، ويحتوي على كذا صيغة من الكحول ضمن مكوناته
قوامه كريمي كثيف ، ونفس المشكله انه ما يجف بسرعه
كأن المنطقة مبلوله أو رطبه بعد التطبيق على البشره بسبب قوامه غليظ
ريحته حلوه جدا ، لكن الحد الأقصى بدون تعرق ساعتين
ما يسوي اي شي ابدا كأني مو حاطه شي
يمكن يصلح للشتاء أكثر
السعر : 6 دينار (60 ريــال / درهم)





ديودرانت نوكس

 

يحتوي على أملاح الالمنيوم والفضه ، لكن حسب كلامهم من مصادر طبيعية
مادري شلون في مصدر طبيعي وصناعي ، يمكن قصدهم ما اضافو له مركبات صناعية
خالي من البرابين والكحول
الشي الزين فيه ان يجف بسرعة أكثر من معظم البقايا ، وريحته فريش ونظيفه
ما يستحمل التعرق الشديد خلال مجهود رياضي مثلا
رغم ان مكتوب عليه Long Lasting يعني طويل المفعول
السعر : 5 دينار (50 ريــال / درهم)





ديودرانت سيبا ميد 

خالي من أملاح الألمنيوم

له ريحه حمضية ما عجبتني وايد ، تشبه الافتر شيف أو الكولونيا الرجالية

مقاومته للعرق متوسطة إلى ضعيفة

لزج شفاف ما يترك أثر أبيض لكن ياخذ وقت طويل على ما ينشف تماماً

السعر : 1.2 دينار (12 ريــال)




الخلاصة من الريفيوز الصغيرة لمجموعة الديودرنتات ، إني بصعوبة الاقي شي طبيعي لكن زين وفعَال في نفس الوقت
مع العلم : طبيعة جسمي ماعندي تعرق شديد ، والمنطقة تكون داااايما نظيفه وخالية (من الشوائب ) P:
وملابسي قطنية ، ولو كان قميص حرير أو غيره لازم البس تحته بودي قطني 100%
مادري ليش مو قادره أحصل شي بالمواصفات اللي أبيها
يعني شي يكون مفعوله نفس الأديداس حبيب قلبي





الوحيد اللي برجع اشتريه غير الاديداس ، هو ايف روشيه في الوقت الحالي
وايد من صديقاتي الانستقراميات مدحو لي ديوردرانت فيشي ، لحد الآن ما جربته
أما ديودرانت لوكسيتان ما عجبني الصراحة ، ريحته على حمضيات قوية وايد وما يتحمل العرق
رغم ان وايد ناس عاجبهم ومرتاحين عليه ..
باقي الأنواع اللي استعملتها ما راح اتطرق لها لأنها بمكونات مزيل العرق العاديه



مع السلامة ~